O‘zbekiston Respublikasi Vazirlar Mahkamasining
qarori
O‘zbekiston Respublikasidan tashqarida amalga oshirilgan dori vositalarini ro‘yxatdan o‘tkazish natijalarini tan olish tartibi to‘g‘risidagi nizomni tasdiqlash haqida
O‘zbekiston Respublikasi Prezidentining “Dori vositalarini davlat ro‘yxatidan o‘tkazish tartibi va ularning aylanishini takomillashtirish bo‘yicha qo‘shimcha chora-tadbirlar to‘g‘risida” 2018-yil 24-sentabrdagi PQ-3948-son qaroriga muvofiq Vazirlar Mahkamasi qaror qiladi:
1. O‘zbekiston Respublikasidan tashqarida amalga oshirilgan dori vositalarini ro‘yxatdan o‘tkazish natijalarini tan olish tartibi to‘g‘risidagi nizom 1-ilovaga muvofiq tasdiqlansin.
2. O‘zbekiston Respublikasi Hukumatining 2-ilovaga muvofiq ayrim qarorlariga o‘zgartirishlar va qo‘shimcha kiritilsin.
3. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari A.A. Abduhakimov va O‘zbekiston Respublikasi Sog‘liqni saqlash vaziri A.K. Shadmanov zimmasiga yuklansin.
O‘zbekiston Respublikasining Bosh vaziri A. ARIPOV
Toshkent sh.,
2018-yil 24-oktabr,
862-son
Vazirlar Mahkamasining 2018-yil 24-oktabrdagi 862-son qaroriga
1-ILOVA
O‘zbekiston Respublikasidan tashqarida amalga oshirilgan dori vositalarini ro‘yxatdan o‘tkazish natijalarini tan olish tartibi to‘g‘risida
NIZOM
1-bob. Umumiy qoidalar
1. Ushbu Nizom O‘zbekiston Respublikasidan tashqarida amalga oshirilgan dori vositalarini ro‘yxatdan o‘tkazish natijalarini tan olish tartibini belgilaydi.
2. Ushbu Nizom talablari O‘zbekiston Respublikasi Prezidentining “Dori vositalarini davlat ro‘yxatidan o‘tkazish tartibi va ularning aylanishini takomillashtirish bo‘yicha qo‘shimcha chora-tadbirlar to‘g‘risida” 2018-yil 24-sentabrdagi PQ-3948-son qarori bilan tasdiqlangan Dori vositalarini ro‘yxatdan o‘tkazish natijalari O‘zbekiston Respublikasida tan olinadigan mamlakatlar va xalqaro tashkilotlar ro‘yxatida ko‘rsatilgan mamlakatlar hamda xalqaro tashkilotlar tomonidan ro‘yxatga olingan va O‘zbekiston Respublikasiga import qilinadigan dori vositalariga joriy etiladi.
3. Mazkur Nizomda quyidagi asosiy tushunchalar qo‘llaniladi:
dori vositalari — kasalliklarning oldini olish, ularga tashxis qo‘yish va davolash, shuningdek, odam organizmining holati va funksiyalarini o‘zgartirish uchun tibbiyot amaliyotida qo‘llashga ruxsat etilgan dori moddalari (substansiyalar) va yordamchi moddalar asosida olingan vositalar, dori moddalari (substansiyalar), dori preparatlari;
dori moddalari (substansiyalar) — farmakologik, immunologik yoki metabolik faollikka ega bo‘lgan yoxud tashxis qo‘yish maqsadida foydalaniladigan, tibbiyot amaliyotida qo‘llashga ruxsat etilgan tabiiy yoki sintetik moddalar;
dori preparatlari — dozalangan, idishga joylangan-o‘ralgan, qo‘llash uchun tayyor dori vositalari;
dori vositasining normativ hujjati — dori vositalarining sifat ko‘rsatkichlari, me’yorlari va sifatini nazorat qilish usullarini, ularning fizik-kimyoviy, fizik, biologik, biokimyoviy, mikrobiologik xususiyatlari va sifatini nazorat qilishning boshqa usullarini o‘z ichiga olgan hujjat;
dori vositasini tibbiyotda qo‘llashga doir yo‘riqnoma — dori vositasining farmakologik xususiyatlari, qo‘llanilishi, qo‘llash mumkin bo‘lmagan holatlar, qo‘llashning o‘ziga xosligi, dozaning oshirib yuborilishi, boshqa dori vositalari bilan o‘zaro ta’siri, saqlash sharoitlari, chiqarish shakllari, ishlab chiqaruvchi haqidagi va boshqa ma’lumotlarni o‘z ichiga olgan hujjat;
ariza beruvchi — O‘zbekiston Respublikasidan tashqarida amalga oshirilgan dori vositalarini ro‘yxatdan o‘tkazish natijalarini tan olish (keyingi o‘rinlarda tan olish deb ataladi) uchun ariza, hujjatlar va materiallarni taqdim etish vakolatiga ega dori vositalarini ishlab chiqaruvchi tashkilot, ro‘yxatdan o‘tkazish guvohnomasining egasi yoki ularning ishonchli vakillari;
4. Dori vositasi taqdim etiladigan hujjatlarni o‘rganish va tan olish haqidagi yozuvni Tibbiyot amaliyotida qo‘llanilishiga ruxsat etilgan dori vositalari, tibbiy buyumlar va tibbiy texnika davlat reyestriga (keyingi o‘rinlarda Davlat reyestri deb ataladi) kiritish orqali O‘zbekiston Respublikasi Sog‘liqni saqlash vazirligi huzuridagi Farmatsevtika tarmog‘ini rivojlantirish agentligining Dori vositalari, tibbiy buyumlar va tibbiy texnika ekspertizasi va standartlashtirish davlat markazi (keyingi o‘rinlarda Davlat markazi deb ataladi) tomonidan tan olinadi.
5. Tan olish davlat ro‘yxatidan o‘tkazish natijalarini va tan olish to‘g‘risidagi yozuvni Davlat reyestriga kiritishni va ariza beruvchilarga ularning xohishiga ko‘ra ushbu reyestrdan ko‘chirma berishni nazarda tutadi.
6. Tan olish natijalari Davlat reyestriga yozuv shaklida besh yil muddatga kiritiladi.
Dastlabki tan olish muddati tugagandan so‘ng ariza beruvchining arizasiga ko‘ra, tan olish natijalari Davlat reyestriga ularning amal qilish muddati cheklanmagan holda kiritilishi mumkin.
7. Quyidagilar:
dori vositalari;
O‘zbekiston Respublikasida ro‘yxatdan o‘tkazilgan dori vositalarining yangi kombinatsiyalari;
O‘zbekiston Respublikasida avval ro‘yxatdan o‘tkazilgan (tan olingan), biroq boshqacha dori shakllarida, dozalarda yoki boshqa ishlab chiqaruvchi tomonidan ishlab chiqarilgan dori vositalari;
O‘zbekiston Respublikasida avval ro‘yxatdan o‘tkazilgan (tan olingan) boshqa o‘ramdagi va/yoki boshqa markirovkali dori vositalari tan olinishi lozim.
8. Davlat reyestridagi tan olish to‘g‘risidagi yozuv dori vositasining davlat ro‘yxatidan o‘tkazilgani va O‘zbekiston Respublikasi Sog‘liqni saqlash vazirligi tomonidan uni tibbiyot amaliyotida qo‘llashga ruxsat berilganini tasdiqlaydi.
9. Tarkibidagi dori moddalari turli xil, ammo savdo nomi bir xil bo‘lgan dori vositalarini, shuningdek, tarkibidagi dori moddalari bir xil, ammo savdo nomi turli xil bo‘lgan dori vositalarining bitta ishlab chiqaruvchisini tan olishga yo‘l qo‘yilmaydi.
2-bob. Tan olish uchun zarur bo‘lgan hujjatlar
10. Ariza beruvchi dori vositalarining tan olinishi uchun Davlat markaziga mazkur Nizomga 1-ilovaga* muvofiq shakldagi arizani:
a) tibbiyotda qo‘llashga doir yo‘riqnoma, yo‘riqnomaning davlat va rus tillariga rasmiy tasdiqlangan tarjimasini;
b) dori vositasining kuyidagilar ko‘rsatilgan hujjatlarini:
dori shakli;
dozasi;
dori vositasining Ro‘yxatda ko‘rsatilgan mamlakat tibbiyot amaliyotida muddati tugagunicha qo‘llashga ruxsat etilgan sana yoki uning Ro‘yxatda ko‘rsatilgan xalqaro tashkilot tomonidan tasdiqlangan sifati, bezararligi va samaradorligi;
dori preparatining tegishli bozor uchun ruxsat etilgan o‘ziga xos raqami (avtorizatsiya);
v) markirovka qo‘yilgan namunaning qog‘oz yoki elektron shakldagi asl nusxasini;
Oldingi tahrirga qarang.
(10-bandning “g” kichik bandi O‘zbekiston Respublikasi Prezidentining 2022-yil 26-oktabrdagi PQ-411-sonli qaroriga asosan chiqarilgan — Qonunchilik ma’lumotlari milliy bazasi, 27.10.2022-y., 07/22/411/0961-son)
d) ishlab chiqaruvchi firmaning normativ hujjati talablariga muvofiq uch marta sinov o‘tkazish uchun yetarli bo‘lgan miqdordagi dori vositasining tahlil qilingani haqidagi sertifikat ilova qilingan namunasini;
e) xorijiy yoki davlatlararo farmatsevtika mahsulotlarini tartibga soluvchi xorijiy vakolatli organ tomonidan berilgan farmatsevtika mahsulotining sertifikati (FMS) yoki uning belgilangan tartibda tasdiqlangan nusxasi. Bunda farmatsevtika mahsuloti sertifikatining (FMS) ekvivalenti bo‘lgan hujjat yoki uning belgilangan tartibda tasdiqlangan nusxasini;
j) dori vositasi normativ hujjatining loyihasini ilova qilgan holda taqdim etadi.
Mazkur bandning kichik bandlaridan birida nazarda tutilgan hujjat ushbu bandning boshqa kichik bandida ko‘rsatilgan ma’lumotni o‘z ichiga olgan bo‘lsa, uni alohida hujjat shaklida taqdim etish talab etilmaydi.
Oldingi tahrirga qarang.
(11-band O‘zbekiston Respublikasi Prezidentining 2022-yil 26-oktabrdagi PQ-411-sonli qaroriga asosan o‘z kuchini yo‘qotgan— Qonunchilik ma’lumotlari milliy bazasi, 27.10.2022-y., 07/22/411/0961-son)
12. Ariza beruvchidan mazkur Nizomda nazarda tutilmagan hujjatlarni taqdim etishni talab qilishga yo‘l qo‘yilmaydi.
13. Zarur hujjatlar ilova qilingan ariza Davlat markaziga bevosita, pochta aloqasi vositalari orqali yoki elektron shaklda, ular olingani haqidagi bildirishnomani olgan holda taqdim etiladi. Elektron shaklda taqdim etilgan hujjatlar ariza beruvchining elektron raqamli imzosi bilan tasdiqlanadi.
Dori vositalarining namunalari bevosita yoki pochta aloqasi vositalari orqali taqdim etiladi.
14. Ariza va hujjatlar Davlat markazining mas’ul shaxsi tomonidan ro‘yxat bo‘yicha qabul qilinadi va uning nusxasi shu kunning o‘zida ariza beruvchiga ular qabul qilingan sana to‘g‘risidagi belgi qo‘yilgan holda yuboriladi (topshiriladi).
3-bob. Arizani ko‘rib chiqish va tan olish yoki tan olishni rad etish to‘g‘risida qaror qabul qilish
Oldingi tahrirga qarang.
15. Tan olish to‘g‘risidagi ariza ko‘rib chiqilganligi uchun ariza berilgan kundagi bazaviy hisoblash miqdorining ellik baravari miqdorida yig‘im undiriladi.
(15-bandning birinchi xatboshisi O‘zbekiston Respublikasi Vazirlar Mahkamasining 2019-yil 28-dekabrdagi 1046-sonli qarori tahririda — Qonun hujjatlari ma’lumotlari milliy bazasi, 29.12.2019-y., 09/19/1046/4242-son)
Yig‘im summasi Davlat markazi hisobraqamiga o‘tkaziladi.
Ariza beruvchi bergan arizasidan voz kechgan taqdirda, to‘langan yig‘im summasi qaytarilmaydi.
16. Ariza Davlat markazi tomonidan 15 ish kunidan oshmaydigan muddatda ko‘rib chiqiladi. Ushbu muddat ariza beruvchi tomonidan tan olish to‘g‘risidagi arizani ko‘rib chiqish uchun yig‘im to‘langan kundan boshlab hisoblanadi.
17. Davlat markazi ro‘yxatdan o‘tkazish hujjatlarini baholash doirasida dori vositasining ro‘yxatdan o‘tkazish hujjatlarini mustaqil ravishda yoki mustaqil ekspertlarni jalb etgan holda o‘rganishi mumkin.
18. Tan olish va bu haqidagi yozuvni Davlat reyestriga kiritish Davlat markazi tomonidan ushbu Nizomga 3-ilovaga muvofiq quyidagi tartibda amalga oshiriladi:
a) Ro‘yxatdan o‘tkazish bo‘limi:
ariza qabul qilinganidan so‘ng ariza hamda unga ilova qilingan hujjatlar va namunalarni birlamchi (dastlabki) o‘rganadi;
ariza beruvchi bilan tan olish masalalari yuzasidan tegishli yozishmalar olib boradi;
birlamchi (dastlabki) o‘rganishning ijobiy natijalari asosida ariza beruvchiga arizani ko‘rib chiqish uchun yig‘im undirilishi bo‘yicha hisobraqamni rasmiylashtiradi;
ariza beruvchi belgilangan yig‘im summasini 30 kundan oshmaydigan muddatda to‘lagandan so‘ng ariza va unga ilova qilinadigan hujjatlar hamda namunalarni keyinchalik o‘rganish uchun Farmakologiya qo‘mitasiga, Farmakopeya qo‘mitasiga, Narkotiklarni nazorat qilish qo‘mitasiga (dori vositalari tarkibida giyohvand vositalar, psixotrop moddalar va prekursorlar mavjud bo‘lgan taqdirda) taqdim etadi;
b) Farmakopeya qo‘mitasi 12 ish kuni davomida:
ariza beruvchi tomonidan taqdim etilgan hujjatlarni o‘rganib chiqadi;
dori vositasining normativ hujjatini tasdiqlaydi;
ariza beruvchi taqdim etgan hujjatlar va ekspertlar xulosalari asosida tan olish yoki tan olishni rad etish to‘g‘risidagi tavsiyalarni O‘zbekiston Respublikasi Sog‘liqni saqlash vazirligi tomonidan belgilangan tartibda tashkil etilgan Ekspertlar kengashiga (keyingi o‘rinlarda Ekspertlar kengashi deb ataladi) kiritadi;
v) Farmakologiya qo‘mitasi 12 ish kuni davomida:
ariza beruvchi tomonidan taqdim etilgan hujjatlarni o‘rganishni amalga oshiradi;
ariza beruvchi taqdim etgan hujjatlar va ekspertlar xulosalari asosida Ekspertlar kengashiga tan olish yoki tan olishni rad etish to‘g‘risida tavsiyalar kiritadi;
dori vositalarini tibbiyotda qo‘llash bo‘yicha yo‘riqnomalarni yoki ularga kiritiladigan o‘zgartirishlarni ma’qullaydi;
g) Narkotiklarni nazorat qilish qo‘mitasi 3 ish kuni davomida:
ariza beruvchi taqdim etgan hujjatlar o‘rganadi;
ariza beruvchi tomonidan tarkibida giyohvand vositalar, psixotrop moddalar va prekursorlar bo‘lgan dori vositalarining hujjatlarini o‘rganib chiqishda tibbiyotda qo‘llanishi davlat nazoratida bo‘lgan Giyohvand vositalar, psixotrop moddalar va prekursorlar ro‘yxatida ushbu moddalarning mavjudligini, shuningdek, ularni shifokor retsepti bo‘yicha berish zarurligini ko‘rib chiqadi hamda Farmakologiya va Farmakopeya qo‘mitalariga takliflar kiritadi;
19. Ekspertlar kengashi Farmakopeya, Farmakologiya qo‘mitalari tavsiyalari asosida bir kun muddatda dori vositasini tan olish va Davlat reyestriga kiritish yoki tan olishni rad etish to‘g‘risida qaror qabul qiladi.
20. Davlat markazi Ekspertlar kengashi tomonidan qaror qabul qilingan kundan keyingi bir ish kunidan kechikmay ariza beruvchini qabul qilingan qaror to‘g‘risida yozma ravishda yoki elektron shaklda Internet tarmog‘i orqali xabardor qilishi shart.
21. Davlat reyestrida keltirilgan ma’lumotlar O‘zbekiston Respublikasi Sog‘liqni saqlash vazirligi va Davlat markazi veb-saytlari orqali umumiy tanishish uchun ochiqdir.
Ariza beruvchi Davlat reyestridan ko‘chirmani Internet tarmog‘i orqali mazkur Nizomga 4-ilovaga* muvofiq shakl bo‘yicha mustaqil ravishda bepul shakllantirish va qog‘ozga chiqarib olish huquqiga egadir.
* Nizomga 1, 2 va 4-ilovalar rus tilidagi matnda berilgan.
22. Quyidagilar tan olish va Davlat reyestriga yozuvni kiritishni rad etishga asos hisoblanadi:
ariza beruvchi tomonidan ekspertiza uchun zarur bo‘lgan hujjatlarning va dori vositalari namunalarining to‘liq hajmda taqdim etilmasligi;
ariza beruvchi tomonidan taqdim etilgan hujjatlarda ishonchsiz yoki buzib ko‘rsatilgan ma’lumotlarning mavjudligi.
Tan olish va Davlat reyestriga yozuvni kiritishning boshqa asoslarga ko‘ra, shu jumladan maqsadga muvofiq emasligi sabablari bo‘yicha rad etilishiga yo‘l qo‘yilmaydi
23. Tan olish va Davlat reyestriga yozuvni kiritish rad etilgani to‘g‘risidagi bildirishnomada rad etishning sabablari va ariza beruvchi ko‘rsatilgan sabablarni bartaraf etib, hujjatlarni qayta ko‘rib chiqish uchun taqdim etishi mumkin bo‘lgan muddat ko‘rsatiladi.
Ariza beruvchi rad etish sabablarini bartaraf etib, hujjatlarni qayta ko‘rib chiqish uchun taqdim etish huquqiga ega bo‘lgan muddat rad etish to‘g‘risidagi yozma yoki elektron shakldagi bildirishnoma olingan kundan boshlab o‘n besh ish kunidan kam bo‘lmasligi kerak.
24. Ariza beruvchi rad etish uchun asos bo‘lgan sabablarni bartaraf etgan taqdirda, hujjatlar Davlat markazi tomonidan rad etish sabablari bartaraf etilgani to‘g‘risidagi ariza hamda rad etish sabablari bartaraf etilganligini tasdiqlovchi tegishli hujjatlar olingan kundan boshlab besh ish kunidan oshmaydigan muddatda qayta ko‘rib chiqiladi.
Arizani qayta ko‘rib chiqish uchun yig‘im undirilmaydi.
25. Hujjatlarni qayta ko‘rib chiqishda rad etish haqidagi bildirishnomada bayon qilinmagan sabablarning keltirilishiga yo‘l qo‘yilmaydi, avval ko‘rsatilgan sabablar bartaraf etilganini tasdiqlovchi hujjatlar bilan bog‘liq bo‘lgan sabablar bundan mustasno.
26. Rad etish haqidagi bildirishnomada ko‘rsatilgan muddat o‘tgandan keyin taqdim etilgan ariza yangi taqdim etilgan hisoblanadi va Davlat markazi tomonidan umumiy asoslarda ko‘rib chiqiladi.
27. Ariza beruvchi tan olishning va Davlat reyestriga yozuvning kiritilishini rad etilishi, shuningdek, Davlat markazi mansabdor shaxsining harakati (harakatsizligi) yuzasidan belgilangan tartibda shikoyat qilish huquqiga ega.
28. Davlat reyestridagi yozuv bilan tasdiqlangan tan olishning amal qilish muddati o‘tgach, dori vositalari davlat ro‘yxatidan o‘tkazilganining amal qilish davrida ishlab chiqarilgan bo‘lsa, ularni sotish va tibbiyot amaliyotida qo‘llashga ruxsat etiladi.
4-bob. Ro‘yxatdan o‘tkazish hujjatlari va Davlat reyestriga o‘zgartirish va qo‘shimchalar kiritish, shuningdek, ularning muddatini uzaytirish
29. Ro‘yxatdan o‘tkazish hujjatlarida keltirilgan ma’lumotlar o‘zgargan taqdirda, ariza beruvchi Davlat markaziga o‘zgartirish va qo‘shimchalar kiritish to‘g‘risidagi ariza bilan ushbu o‘zgartirishlarni tasdiqlovchi tegishli hujjatlarni ilova qilgan holda murojaat qiladi.
30. Taklif etilayotgan o‘zgartirish va qo‘shimchalar dori vositasining sifati, samaradorligi va xavfsizligining yomonlashuviga olib kelishi mumkin bo‘lgan holatlarda, Davlat markazi ro‘yxatdan o‘tkazish hujjatlariga o‘zgartirish va qo‘shimchalar kiritishni rad etadi.
31. Davlat reyestriga o‘zgartirish va qo‘shimchalar kiritish to‘g‘risidagi ariza o‘n ish kunidan oshmaydigan muddatda ko‘rib chiqiladi.
32. Tan olishning amal qilish muddati ariza beruvchining Davlat markaziga taqdim etgan arizasiga binoan uzaytirilishi mumkin. Tan olishning amal qilish muddatini uzaytirish to‘g‘risidagi ariza Davlat markaziga uning amal qilish muddati tugashidan ikki oy oldin taqdim etilishi kerak.
Birinchi marta tan olishning amal qilish muddatini uzaytirish to‘g‘risidagi ariza mazkur bandda ko‘rsatilgan muddat o‘tgandan keyin taqdim etilganda, ariza birinchi marta tan olish uchun taqdim etilgandek hisoblanadi va Davlat markazi tomonidan umumiy asoslarda ko‘rib chiqiladi.
33. Tan olishning amal qilish muddati birinchi marta tan olish uchun nazarda tutilgan tartibda uzaytiriladi.
Birinchi marta tan olishning amal qilishi muddati o‘tgandan so‘ng tan olish natijalari Davlat reyestriga ularning amal qilish muddati cheklanmagan holda kiritiladi.
34. Davlat reyestriga o‘zgartirish va qo‘shimchalar kiritish, shuningdek, tan olishning amal qilish muddatini uzaytirish to‘g‘risidagi arizani ko‘rib chiqish uchun tan olish to‘g‘risidagi arizani ko‘rib chiqishga to‘lanadigan summaning yarmi miqdorida yig‘im undiriladi.
5-bob. Tan olishni to‘xtatish va bekor qilish
35. Davlat markazi quyidagi hollarda tan olishning amal qilishini to‘xtatadi va uni Davlat reyestridan chiqaradi:
dori vositasi O‘zbekiston Respublikasida va Ro‘yxatda ko‘rsatilgan mamlakatlarda qo‘llash taqiqlanganda;
dori vositasi qo‘llanilganda tibbiyotda qo‘llashga doir yo‘riqnomada ko‘rsatilmagan jiddiy nojo‘ya ta’sirlar aniqlanganda;
dori vositasi qo‘llanilganda fuqarolar sog‘ligi uchun og‘ir asoratlar aniqlanganda;
ariza beruvchining xohishiga ko‘ra.
36. Soxta hujjatlardan foydalangan holda tan olish amalga oshirilgani va Davlat reyestriga bu haqida yozuv kiritilgani aniqlangan taqdirda, sud tartibida tan olishning amal qilishi bekor qilinadi hamda Davlat reyestridan bu haqidagi yozuv chiqarib tashlanadi.
6-bob. Yakunlovchi qoidalar
Oldingi tahrirga qarang.
37. Ariza beruvchi ishonchsiz yoki noto‘g‘ri ma’lumotlarni taqdim etgani uchun qonunchilikka muvofiq javob beradi.
(37-band O‘zbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik ma’lumotlari milliy bazasi, 05.04.2022-y., 09/22/153/0266-son)
Oldingi tahrirga qarang.
38. Mazkur Nizom talablarining buzilishida aybdor bo‘lgan shaxslar qonunchilikda belgilangan tartibda javobgar bo‘ladi.
(38-band O‘zbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik ma’lumotlari milliy bazasi, 05.04.2022-y., 09/22/153/0266-son)
O‘zbekiston Respublikasidan tashqarida amalga oshirilgan dori vositalarini ro‘yxatdan o‘tkazish natijalarini tan olish tartibi to‘g‘risidagi nizomga
3-ILOVA
O‘zbekiston Respublikasidan tashqarida amalga oshirilgan dori vositalarini ro‘yxatdan o‘tkazish natijalarini tan olish
SXEMASI
Vazirlar Mahkamasining 2018-yil 24-oktabrdagi 862-son qaroriga
2-ILOVA
O‘zbekiston Respublikasi Hukumatining ayrim qarorlariga kiritilayotgan o‘zgartirishlar va qo‘shimcha
1. Vazirlar Mahkamasining 2016-yil 27-oktabrdagi 365-son qarori (O‘zbekiston Respublikasi QT, 2016, 10-son, 100-modda) bilan tasdiqlangan Dori vositalarining xavfsizligi to‘g‘risidagi umumiy texnik reglamentning 3-bandiga quyidagi mazmundagi o‘n yettinchi xatboshi qo‘shilsin:
“dorivor angro-mahsulot — yirik qadoqda ishlab chiqariladigan va sotiladigan, shuningdek, keyinchalik tayyor dori vositalarini ishlab chiqarish (tayyorlash) uchun ishlatiladigan dori vositasi”.
2. O‘zbekiston Respublikasi Vazirlar Mahkamasining 2017-yil 6-apreldagi 185-son qarori (O‘zbekiston Respublikasi QT, 2017-y., 4-son, 40-modda) bilan tasdiqlangan Dori vositalarini va tibbiy buyumlarni chakana realizatsiya qilish tartibi to‘g‘risidagi nizomda:
a) 10-bandning uchinchi xatboshi quyidagi tahrirda bayon etilsin:
“Chetdan olib kelinadigan, shuningdek, mamlakatimiz ishlab chiqaruvchilaridan sotib olinadigan dori vositalari va tibbiyot buyumlari ijtimoiy dorixonalar tomonidan ularni yetkazib berishda ishtirok etuvchi vositachilar sonidan qat’i nazar, xarid qilish narxi yoki ulgurji narxning 10 foizidan ortiq bo‘lmagan cheklangan savdo ustamasi ko‘llanilgan holda chakana sotiladi”;
b) 24-bandning ikkinchi xatboshi quyidagi tahrirda bayon qilinsin:
“Ijtimoiy dorixonalar Ijtimoiy ahamiyatga ega dori vositalari va tibbiyot buyumlarining qonunchilikka muvofiq tasdiqlangan ro‘yxatini davlat va rus tillarida 12 shrift o‘lchamidan kam bo‘lmagan o‘lchamda ko‘rinadigan joyga osib qo‘yishlari shart”.
Oldingi tahrirga qarang.
(3-band O‘zbekiston Respublikasi Vazirlar Mahkamasining 2022-yil 21-fevraldagi 80-sonli qaroriga asosan 2022-yil 1-martdan o‘z kuchini yo‘qotadi — Qonunchilik ma’lumotlari milliy bazasi, 22.02.2022-y., 09/22/80/0154-son)
4. Vazirlar Mahkamasining 2017-yil 18-sentabrdagi 741-son qarori (O‘zbekiston Respublikasi QT, 2017-y., 9-son, 214-modda) bilan tasdiqlangan Ijtimoiy ahamiyatga ega dori vositalari va tibbiyot buyumlariga ehtiyojni aniqlash tartibi to‘g‘risidagi nizom 2-bandining to‘rtinchi xatboshi quyidagi tahrirda bayon etilsin:
“ijtimoiy ahamiyatga ega dori vositalari va tibbiyot buyumlari — ijtimoiy ahamiyatga ega va atrofdagilar uchun xavf tug‘diradigan kasalliklarning oldini olish hamda davolash uchun talab yuqori bo‘lgan va aholi, tibbiyot tashkilotlari tomonidan ko‘p foydalaniladigan, O‘zbekiston Respublikasi Sog‘liqni saqlash vazirligi tasdiqlaydigan Ijtimoiy ahamiyatga ega dori vositalari va tibbiyot buyumlarining ro‘yxatiga kiritilgan dori vositalari va tibbiyot buyumlari”.
5. Vazirlar Mahkamasining “O‘zbekiston Respublikasi Sog‘liqni saqlash vazirligi huzuridagi Farmatsevtika tarmog‘ini rivojlantirish agentligi faoliyatini tashkil etish to‘g‘risida” 2017-yil 18-dekabrdagi 993-son qarorida (O‘zbekiston Respublikasi QT, 2017-y., 12-son, 291-modda):
a) 4-ilovada:
8-bandning yettinchi xatboshidagi “shuningdek, ularga qat’iy narxlarni belgilash bo‘yicha takliflar tayyorlash va kiritish” so‘zlari chiqarib tashlansin;
9-bandning “e” kichik bandida:
birinchi xatboshidagi “shuningdek, ularga qat’iy narxlarni belgilash bo‘yicha takliflar tayyorlash va kiritish” so‘zlari chiqarib tashlansin;
uchinchi xatboshidagi “ijtimoiy ahamiyatli dori vositalari va tibbiy buyumlarning qat’iy narxlarini belgilash bo‘yicha O‘zbekiston Respublikasi Sog‘liqni saqlash vaziriga takliflar kiritadi” so‘zlari chiqarib tashlansin;
b) 5-ilova 6-bandining “e” kichik bandida:
“shuningdek, ularga qat’iy narxlarni belgilash bo‘yicha takliflar tayyorlash va kiritish” so‘zlari chiqarib tashlansin;
uchinchi xatboshi chiqarib tashlansin.

(Qonun hujjatlari ma’lumotlari milliy bazasi, 25.10.2018-y., 09/18/862/2097-son; 29.12.2019-y., 09/19/1046/4242-son; Qonunchilik ma’lumotlari milliy bazasi, 22.02.2022-y., 09/22/80/0154-son, 09/22/153/0266-son, 27.10.2022-y., 07/22/411/0961-son)