O‘zbekiston Respublikasi Vazirlar Mahkamasining
qarori
Muvofiqlikni baholash organlarini akkreditatsiyadan o‘tkazish sohasidagi ishlarni takomillashtirishga doir qo‘shimcha chora-tadbirlar to‘g‘risida
O‘zbekiston Respublikasi Prezidentining “O‘zbekiston Respublikasi Prezidenti huzuridagi Loyiha boshqaruvi milliy agentligi faoliyatini yanada takomillashtirish chora-tadbirlari to‘g‘risida” 2019-yil 10-yanvardagi PF-5624-son Farmonini bajarish, shuningdek, muvofiqlikni baholash organlarini xalqaro standartlarga muvofiq akkreditatsiyadan o‘tkazish milliy tizimini yanada takomillashtirish maqsadida Vazirlar Mahkamasi qaror qiladi:
Oldingi tahrirga qarang.
1. O‘zbekiston texnik jihatdan tartibga solish agentligi tuzilmasida muvofiqlikni baholash organlarini akkreditatsiyadan o‘tkazuvchi maxsus vakolatli organ hisoblangan “O‘zbekiston akkreditatsiya markazi” DUK (keyingi o‘rinlarda Akkreditatsiya markazi deb ataladi) tashkil etilgani ma’lumot uchun qabul qilinsin.
(1-band O‘zbekiston Respublikasi Vazirlar Mahkamasining 2022-yil 11-martdagi 114-sonli qarori tahririda — Qonunchilik ma’lumotlari milliy bazasi, 12.03.2022-y., 09/22/114/0209-son)
2. Quyidagilar Akkreditatsiya markazining ustuvor vazifalari va faoliyat yo‘nalishlari etib belgilansin:
muvofiqlikni baholash organlarini akkreditatsiyadan o‘tkazishda akkreditatsiya jarayonining betarafligi va xolisligini ta’minlagan holda manfaatlar to‘qnashuviga yo‘l qo‘ymaslik;
Akkreditatsiya bo‘yicha Osiyo-Tinch okeani hamkorligiga (ARAS), Laboratoriyalar akkreditatsiyasi bo‘yicha xalqaro tashkilotga (ILAC) va Akkreditatsiya bo‘yicha xalqaro forumga (IAF) to‘laqonli a’zo sifatida kirish;
akkreditatsiya milliy tizimini xalqaro normalar va mezonlarga muvofiq doimiy ravishda rivojlantirish va qo‘llab-quvvatlash, ISO/IEC 17011 xalqaro standarti talablariga rioya qilish;
akkreditatsiya tartib-taomillariga taalluqli zarur axborotni, shu jumladan, o‘zining rasmiy veb-sayt orqali erkin olish imkoniyatini yaratish;
O‘zbekiston Respublikasining xalqaro shartnomalari asosida akkreditatsiya bo‘yicha ishlar natijalarining xorijiy mamlakatlar tomonidan e’tirof etilishini ta’minlash yuzasidan zarur choralar ko‘rish;
akkreditatsiyadan o‘tkazilgan tashkilotlar va ularning akkreditatsiya sohasi to‘g‘risidagi ma’lumotlar bazasining shakllantirilishi va dolzarb holatda saqlanishini, shuningdek, tegishli axborotning maxfiyligiga rioya qilgan holda jamoatchiliknining ulardan foydalanishini ta’minlash.
3. Quyidagilar:
Muvofiqlikni baholash organlarini akkreditatsiyadan o‘tkazish tartibi to‘g‘risidagi nizom 1-ilovaga muvofiq;
Oldingi tahrirga qarang.
“O‘zbekiston akkreditatsiya markazi” DUKning Akkreditatsiya bo‘yicha Osiyo-Tinch okeani hamkorligi (ARAS), Laboratoriyalar akkreditatsiyasi bo‘yicha xalqaro tashkilot (ILAC) va Akkreditatsiya bo‘yicha xalqaro forumga (IAF) to‘laqonli a’zo sifatida kirishi bo‘yicha tadbirlar rejasi 2-ilovaga muvofiq tasdiqllansin.
(3-bandning uchinchi xatboshisi O‘zbekiston Respublikasi Vazirlar Mahkamasining 2022-yil 11-martdagi 114-sonli qarori tahririda — Qonunchilik ma’lumotlari milliy bazasi, 12.03.2022-y., 09/22/114/0209-son)
4. Belgilab qo‘yilsinki:
muvofiqlikni baholash organlari akkreditatsiyadan o‘tganligi to‘g‘risida oldin berilgan guvohnomalar haqiqiy hisoblanadi va Akkreditatsiya markazi muvofiqlikni baholash organlari va metrologiya xizmatlari faoliyatini inspeksiya nazoratidan o‘tkazish natijalariga ko‘ra, akkreditatsiyadan o‘tkazilganlik to‘g‘risidagi guvohnomani tasdiqlash haqida qaror qabul qilsa, ushbu guvohnomalar bunday qaror qabul qilingan sanadan boshlab o‘zining amal qiladigan muddatiga qayta rasmiylashtirilishi lozim;
Akkreditatsiya markazi xodimlarining lavozim maoshi 2 baravar miqdordagi koeffitsiyentni qo‘llangan holda, Yagona tarif setkasi bo‘yicha mehnatga haq to‘lashga doir tasdiqlangan razryadlarga muvofiq belgilanadi;
akkreditatsiyadan o‘tkazishda, inspeksiya nazoratida va ularning natijalari bo‘yicha qarorlar qabul qilishda, davlat organlari va boshqa tashkilotlarning Akkreditatsiya markazi faoliyatiga har qanday shaklda aralashishi va ta’sir ko‘rsatishiga yo‘l qo‘yilmaydi.
5. Akkreditatsiya markaziga quyidagi huquqlar berilsin:
akkreditatsiya sohasida idoralararo xususiyatga ega, shu jumladan, xorijda akkreditatsiya ishlari natijalari e’tirof etilishini ta’minlashga qaratilgan xalqaro shartnomalarni belgilangan tartibda tuzish;
ISO/IEC 17000 xalqaro standartlariga, shuningdek, Akkreditatsiya bo‘yicha Osiyo-Tinch okeani hamkorligi (ARAS), Laboratoriyalar akkreditatsiyasi bo‘yicha xalqaro tashkilot (ILAC) va Akkreditatsiya bo‘yicha xalqaro forum (IAF) talablari va tavsiyalariga muvofiq akkreditatsiya tartibotlari bo‘yicha qoidalar, yo‘riqnomalar va nizomlar ishlab chiqish va tasdiqlash;
treninglar, seminarlar o‘tkazish va baholovchilar, texnik ekspertlar, shuningdek, muvofiqlikni baholash sohasida ishtirok etuvchi mutaxassislar malakasini baholash;
o‘z xizmat vazifalarini vijdonan va samarali bajarayotgan xodimlarga o‘z mablag‘lari hisobidan lavozim maoshining ikki baravari miqdorigacha bo‘lgan miqdorda har oylik ustamalar to‘lash;
eng yaxshi amaliyotlarga muvofiq vazifalarni sifatli bajarish maqsadida mustaqil maslahatchilar va ekspertlarni, shu jumladan xorijiy maslahatchilar va ekspertlarni shartnoma asosida jalb qilish;
ushbu qaror talablariga muvofiq Akkreditatsiya markazining tuzilmasini, xodimlarining shtatdagi soni va ish haqi miqdorlarini mustaqil tasdiqlash.
Oldingi tahrirga qarang.
6. O‘zbekiston texnik jihatdan tartibga solish agentligi:
(6-bandning birinchi xatboshisi O‘zbekiston Respublikasi Vazirlar Mahkamasining 2022-yil 11-martdagi 114-sonli qarori tahririda — Qonunchilik ma’lumotlari milliy bazasi, 12.03.2022-y., 09/22/114/0209-son)
Akkreditatsiya markazi, O‘zbekiston Respublikasi Savdo-sanoat palatasi va boshqa manfaatdor vazirliklar, idoralar, nodavlat tashkilotlar vakillari, tadbirkorlik subyektlari va jismoniy shaxslar ishtirokida akkreditatsiya milliy tizimini rivojlantirishning strategik yo‘nalishlarini belgilab beruvchi va Akkreditatsiya markazi ushbu yo‘nalishlarga erishishi yuzasidan monitoring olib boruvchi Akkreditatsiya bo‘yicha kengashni tashkil etsin;
o‘z faoliyatida, shuningdek, tasarrufidagi tashkilotlar faoliyatida Akkreditatsiya markazi mustaqilligi va xolisligiga shubha uyg‘otishi mumkin bo‘lgan biror-bir xatti-harakatlarni amalga oshirmasin;
Akkreditatsiya markazi direktorini tayinlashda ILAC va IAF talablari va prinsiplariga, ISO/IEC standartlariga hamda Akkreditatsiya bo‘yicha kengash tavsiyalariga amal qilsin;
ikki oy muddatda respublika hududida amal qiladigan ISO/IEC 17000 standartlarining dolzarbligi va jahon miqyosida amal qiladigan standartlar bilan bir xilligini qayta ko‘rib chiqsin;
uch oy muddatda tegishli vazirlik va idoralar bilan birgalikda jahon tajribasi asosida muvofiqlikni baholash organlari vakolatlarini baholashni ularning oldiga qo‘yilgan vazifalardan kelib chiqqan holda, shu jumladan ularni Akkreditatsiya markazi tomonidan ma’qullash va/yoki notifikatsiya qilish yo‘li orqali akkreditatsiyadan o‘tkazish tartib-taomillari o‘rniga muqobil va soddalashtirilgan baholash turlarini joriy etish bo‘yicha Vazirlar Mahkamasiga takliflar kiritsin.
7. Akkreditatsiya markazi rahbari zimmasiga quyidagilar uchun shaxsiy mas’uliyat yuklansin:
muvofiqlikni baholash sohasidagi ILAC, IAF talablariga va ISO/IEC standartlariga asoslangan prinsiplarga so‘zsiz rioya qilish;
akkreditatsiya bo‘yicha ishlarni bajarishda xolislik, betaraflik va mustaqillikni ta’minlash;
baholashni amalga oshirishda ishtirok etmagan Akkreditatsiya markazining malakali shaxslari bilangina akkreditatsiya bo‘yicha qaror qabul qilish;
akkreditatsiya bo‘yicha faoliyatning xolisligi, betarafligi va mustaqilligini shubha uyg‘otishi mumkin bo‘lgan xizmatlarni ko‘rsatmaslik.
8. O‘zbekiston Respublikasi Hukumatining 3-ilovaga muvofiq ayrim qarorlari o‘z kuchini yo‘qotgan deb hisoblansin.
9. “O‘zstandart” agentligi manfaatdor vazirliklar va idoralar bilan birgalikda o‘zlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.
10. Mazkur qarorning bajarilishini nazorat qilish O‘zbekiston Respublikasi Vazirlar Mahkamasining yoqilg‘i-energetika sohasi va sanoatning bazaviy tarmoqlarini rivojlantirish masalalari kotibiyatiga va “O‘zstandart” agentligi bosh direktori D.N. Sattarov zimmasiga yuklansin.
O‘zbekiston Respublikasining Bosh vaziri A. ARIPOV
Toshkent sh.,
2019-yil 24-aprel,
349-son
Vazirlar Mahkamasining 2019-yil 24-apreldagi 349-son qaroriga
1-ILOVA
Muvofiqlikni baholash organlarini akkreditatsiyadan o‘tkazish tartibi to‘g‘risida
NIZOM
1-bob. Umumiy qoidalar
Oldingi tahrirga qarang.
1. Ushbu Nizom “O‘zbekiston akkreditatsiya markazi” DUKda (keyingi o‘rinlarda Markaz deb ataladi) qonunchilikka muvofiq akkreditatsiyadan o‘tadigan muvofiqlikni baholash organlari va metrologiya xizmatlari faoliyatini akkreditatsiyadan o‘tkazish va inspeksiya nazoratini amalga oshirish tartibini belgilaydi.
(1-band O‘zbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik ma’lumotlari milliy bazasi, 05.04.2022-y., 09/22/153/0266-son)
2. Ushbu Nizomda quyidagi asosiy tushunchalar qo‘llaniladi:
akkreditatsiya komissiyasi — baholovchilar, jalb qilinadigan texnik ekspertlar, shu jumladan baholashda ishtirok etmagan xalqaro ekspertlardan iborat Markaz huzurida tashkil etiladigan komissiya bo‘lib, akkreditatsiya va inspeksiya nazorati bo‘yicha ishlar natijalarini ko‘rib chiqish hamda ushbu Nizomda nazarda tutilgan tegishli qarorlarni qabul qilish uning asosiy vazifasi hisoblanadi;
akkreditatsiya — muvofiqlikni baholash bo‘yicha faoliyatning muayyan sohasida ishlarni bajarishga yuridik shaxslarning vakolatlarining Markaz tomonidan rasman tasdiqlanishi;
apellatsiya komissiyasi — apellatsiya bergan akkreditatsiya obyektini baholashda ishtirok etmagan va akkreditatsiya komissiyasi tarkibida bo‘lmagan, shu jumladan, xalqaro, baholovchilar, jalb qilinadigan texnik ekspertlardan, iborat Markaz tomonidan tashkil etiladigan komissiya bo‘lib, akkreditatsiya komissiyasining qarorlari bo‘yicha apellatsiyani ko‘rib chiqish uning asosiy vazifasi hisoblanadi;
ikkinchi tomon — muvofiqligi baholanayotgan obyektdan iste’molchi sifatida manfaatdor bo‘lgan jismoniy yoki yuridik shaxs;
ariza beruvchi — Markazga akkreditatsiya to‘g‘risidagi tegishli ariza bilan murojaat qilgan yuridik shaxs yoki u tomonidan belgilangan tartibda vakolat berilgan shaxs;
milliy akkreditatsiya tizimi belgisi (keyingi o‘rinlarda akkreditatsiya belgisi deb ataladi) — akkreditatsiyadan o‘tkazilgan muvofiqlikni baholash organlari va metrologiya xizmatlarining akkreditatsiya maqomini belgilash maqsadida ular tomonidan qo‘llanishi uchun mo‘ljallangan Markaz tomonidan beriladigan belgi;
inspeksiya nazorati — muvofiqlikni baholash organlari va metrologiya xizmatlarining akkreditatsiya davrida belgilangan talablarga muvofiqligini tasdiqlash maqsadida Markaz tomonidan davriy baholash tartib-taomili;
akkreditatsiya sohasi — akkreditatsiya so‘ralayotgan yoki taqdim etilgan muvofiqlikni baholash bo‘yicha faoliyatning muayyan sohasi;
akkreditatsiya obyekti — muvofiqlikni baholash organlari va metrologiya xizmatlari, shu jumladan ularni baholash jarayonida;
muvofiqlikni baholash organlari — yuridik shaxslar hisoblanadigan va muvofiqlikni baholash bo‘yicha ishlarni bajarish uchun belgilangan tartibda akkreditatsiyadan o‘tgan inspeksiya organlari, tibbiy, sinov va kalibrlash laboratoriyalari (markazlari), provayderlar, mahsulotni, xizmatlarni, menejment tizimlarini, xodimlarni sertifikatlashtirish organlari;
baholash — akkreditatsiyaning aniq bir sohasi uchun texnik jihatdan tartibga solishga doir normativ hujjatlar asosida akkreditatsiya obyekti vakolatli ekanini aniqlash maqsadida Markaz tomonidan amalga oshiriladigan jarayon;
baholovchi — muvofiqlikni baholash organi va metrologiya xizmatlarini mustaqil ravishda yoki baholash guruhi tarkibida baholash uchun Markaz tomonidan tayinlangan shaxs;
birinchi tomon — ishlab chiqaruvchi yoki xizmatlar ko‘rsatuvchi manfaatlarini ifodalovchi yuridik shaxs;
baholash guruhi rahbari — zimmasiga baholash jarayoniga rahbarlik qilish uchun umumiy mas’uliyat yuklangan va Markaz tomonidan vakolat berilgan baholovchi;
akkreditatsiya to‘g‘risidagi guvohnoma — akkreditatsiyaning belgilangan sohasida ishlarni bajarish uchun muvofiqlikni baholash organining va metrologiya xizmatining vakolatli ekanligini tasdiqlovchi hujjat;
texnik ekspert — ishlarni tashkil etish, muvofiqlikni baholash sohasidagi jarayon yoki faoliyat xususida maxsus bilim va tajribaga ega bo‘lgan, shartnoma asosida akkreditatsiya obyektini baholash va inspeksiya nazoratini o‘tkazish uchun Markaz tomonidan jalb qilinadigan jismoniy shaxs;
uchinchi tomon — birinchi va ikkinchi tomonlardan mustaqil bo‘lgan jismoniy yoki yuridik shaxs.
2-bob. Akkreditatsiya talablari va shartlari
3. Quyidagilar akkreditatsiyaning umumiy talablari va shartlari hisoblanadi:
akkreditatsiya uchun ariza beruvchilarning vakolati va baholashga qo‘yilgan talablarni tartibga soluvchi normativ-huquqiy hujjatlarga shuningdek, texnik jihatdan tartibga solish sohasidagi hujjatlarga majburiy rioya qilish;
akkreditatsiya obyektlarining normal va samarali faoliyatini amalga oshirish uchun zarur bo‘lgan mulk huquqi yoki boshqa ashyoviy huquq asosida (shu jumladan, ijara huquqlari asosida) taalluqli bo‘lgan bino va inshootlar, texnik-texnologik hamda apparat-dasturiy vositalar mavjudligi;
joriy etilgan va amaldagi sifat menejmenti tizimi mavjudligi hamda akkreditatsiya obyekti faoliyatida uning talablariga rioya etish;
malakasi akkreditatsiya jarayonida Markaz tomonidan baholanadigan va akkreditatsiyaning ariza berilgan sohasida malakali xodimlarning mavjudligi, ularning o‘zaro almashinuvchanligini ta’minlash;
akkreditatsiyaning ariza berilgan sohasiga muvofiq texnik jihatdan tartibga solish sohasida normativ hujjatlarning mavjudligi;
akkreditatsiya obyektlari tomonidan ushbu Nizomning 9-bobida ko‘rsatilgan majburiyatlarga o‘z vaqtida rioya qilish.
Akkreditatsiya qilishda akkreditatsiya sohasidagi xalqaro qoidalar, Akkreditatsiya bo‘yicha xalqaro forum talablari (IAF) va Laboratoriyalar akkreditatsiyasi bo‘yicha xalqaro tashkilot (ILAC) talablari hisobga olinadi.
4. Quyidagilar ariza beruvchini akkreditatsiyadan o‘tkazish uchun qo‘shimcha shartlar hisoblanadi:
Oldingi tahrirga qarang.
a) mahsulotlarni sertifikatlashtirish organi sifatida:
(4-band “a” kichik bandining birinchi xatboshisi O‘zbekiston Respublikasi Vazirlar Mahkamasining 2022-yil 11-martdagi 114-sonli qarori tahririda — Qonunchilik ma’lumotlari milliy bazasi, 12.03.2022-y., 09/22/114/0209-son)
akkreditatsiya obyektining ishlab chiqaruvchilar, sotuvchilar, ijrochilar va iste’molchilardan mustaqilligi;
Oldingi tahrirga qarang.
baholanayotgan obyektning texnik jihatdan tartibga solish sohasidagi normativ hujjatida belgilangan majburiy ko‘rsatkichlarining aksariyat qismi aniqlashini ta’minlaydigan, belgilangan tartibda akkreditatsiyadan o‘tkazilgan o‘z sinov laboratoriyasining (markazi) mavjudligi va professional javobgarligi sug‘urta qilinganligi (paxta mahsulotlarini sertifikatlash xizmatlari uchun);
(4-band “a” kichik bandining uchinchi xatboshisi O‘zbekiston Respublikasi Vazirlar Mahkamasining 2023-yil 30-maydagi 223-sonli qarori tahririda — Qonunchilik ma’lumotlari milliy bazasi, 01.06.2023-y., 09/23/223/0305-son)
baholanayotgan obyekt majburiy ko‘rsatkichlarining yetishmayotgan qismi aniqlashini ta’minlovchi akkreditatsiyadan o‘tkazilgan boshqa sinov laboratoriyalari (markazlari) bilan hamkorlik to‘g‘risidagi bitimlarning mavjudligi;
Oldingi tahrirga qarang.
ariza beruvchini mahsulotning muvofiqlik deklaratsiyalarini ro‘yxatdan o‘tkazish uchun sertifikatlashtirish organi sifatida akkreditatsiyadan o‘tkazishda mazkur bandning “a” kichik bandi uchinchi va to‘rtinchi xatboshlarida ko‘rsatilgan shartlarning bajarilishi talab etilmaydi;
(4-bandning “a” kichik bandi O‘zbekiston Respublikasi Vazirlar Mahkamasining 2022-yil 11-martdagi 114-sonli qaroriga asosan xatboshi bilan to‘ldirilgan — Qonunchilik ma’lumotlari milliy bazasi, 12.03.2022-y., 09/22/114/0209-son)
b) yuklarni ortishdan oldin va/yoki tushirish vaqtidagi inspeksiyani o‘tkazish bo‘yicha inspeksiya organ sifatida akkreditatsiyaning ariza berilgan sohasida, mahsulotning muvofiqligini baholash uchun tegishli texnika vositalari va asbob uskunalar yoki laboratoriyaning mavjudligi;
v) xizmatlar, menejment tizimlari, xodimlarni sertifikatlash organining baholanayotgan tarafdan mustaqilligi;
Oldingi tahrirga qarang.
g) sinov, kalibrlash va tibbiyot laboratoriyalari (markazlar), metrologik xizmatlar sifatida (o‘lchashlarning yagona birlikda bo‘lishini ta’minlashga doir normativ hujjatlarning metrologik ekspertizasini o‘tkazadigan metrologiya xizmatlari bundan mustasno):
(4-band “g” kichik bandining birinchi xatboshisi O‘zbekiston Respublikasi Vazirlar Mahkamasining 2022-yil 11-martdagi 114-sonli qarori tahririda — Qonunchilik ma’lumotlari milliy bazasi, 12.03.2022-y., 09/22/114/0209-son)
texnik jihatdan tartibga solish sohasida normativ hujjatlar talablariga muvofiq bo‘lgan ishlab chiqarish binolari va atrof — muhit sharoitlarining mavjudligi;
Oldingi tahrirga qarang.
akkreditatsiyaning ariza berilgan sohasiga muvofiq sinovlar o‘tkazilishini va/yoki o‘lchashlarning bajarilishini ta’minlaydigan sinov, o‘lchash vositalari, standart namunalar va sinash asbob-uskunalarining mavjudligi.
(4-band “g” kichik bandining uchinchi xatboshisi O‘zbekiston Respublikasi Vazirlar Mahkamasining 2022-yil 11-martdagi 114-sonli qarori tahririda — Qonunchilik ma’lumotlari milliy bazasi, 12.03.2022-y., 09/22/114/0209-son)
Oldingi tahrirga qarang.
(5-band O‘zbekiston Respublikasi Vazirlar Mahkamasining 2022-yil 11-martdagi 114-sonli qaroriga asosan o‘z kuchini yo‘qotgan — Qonunchilik ma’lumotlari milliy bazasi, 12.03.2022-y., 09/22/114/0209-son)
6. Akkreditatsiyadan o‘tkazilgan sinov, kalibrlash, tibbiyot laboratoriyalari (markazlari) va metrologik xizmatlar, amaldagi akkreditatsiya doirasiga muvofiq o‘zi qo‘llayotgan sinov va o‘lchov vositalaridan, standart namunalardan va sinash asbob-uskunalaridan foydalanish va/yoki ularni qo‘llash huquqlarining, akkreditatsiyadan o‘tishga talabgor bo‘lgan ariza beruvchilar foydasiga berilishiga yo‘l qo‘yilmaydi, O‘zbekiston Respublikasi Prezidenti va/yoki O‘zbekiston Respublikasi Vazirlar Mahkamasining qarorlarida nazarda tutilgan hollar bundan mustasno.
3-bob. Akkreditatsiya o‘tkazish tartibi
7. Ariza beruvchilarni akkreditatsiyadan o‘tkazish ushbu Nizomga 1-ilovada keltirilgan sxemaga muvofiq amalga oshiriladi.
Ariza beruvchi Markaz tomonidan belgilangan shakl bo‘yicha Markazga ushbu Nizomning 8-bandida ko‘rsatilgan hujjatlar va ma’lumotlarni ilova qilgan holda, yozma yoki elektron shaklda akkreditatsiya qilishga buyurtma (keyingi o‘rinlarda buyurtma deb ataladi) beradi.
8. Ariza beruvchilar buyurtmaga quyidagi hujjatlarni va ma’lumotlarni ilova qiladi:
akkreditatsiya qilinishi so‘ralayotgan akkreditatsiya sohasini aniqlovchi muvofiqlikni baholash obyektlari yoki sinov usullari (metodikalari) va/yoki o‘lchash turlarining ro‘yxati;
sifat bo‘yicha qo‘llanma va sifat menejmenti tizimi tartib-tamoyil hujjatlari;
Oldingi tahrirga qarang.
mahsulot, xizmatlar, menejment tizimlari, xodimlarni sertifikatlash organlari va inspeksiya organi uchun qo‘shimcha ravishda — xodimlar to‘g‘risidagi ma’lumotlar, sertifikatlashni (inspeksiyani) o‘tkazish tartibi to‘g‘risidagi hujjat va inspeksiya organi tomonidan qo‘llaniladigan (zarur hollarda) texnika vositalari va asbob uskunalar to‘g‘risidagi hujjat;
(8-bandning to‘rtinchi xatboshisi O‘zbekiston Respublikasi Vazirlar Mahkamasining 2022-yil 11-martdagi 114-sonli qarori tahririda — Qonunchilik ma’lumotlari milliy bazasi, 12.03.2022-y., 09/22/114/0209-son)
Oldingi tahrirga qarang.
sinov, kalibirlash va tibbiyot laboratoriyalari (markazlari), metrologiya xizmatlari uchun qo‘shimcha ravishda — laboratoriya, xodimlar va ular tomonidan qo‘llaniladigan sinov, o‘lchash vositalari hamda sinov uskunasi to‘g‘risidagi ma’lumotlar;
(8-bandning beshinchi xatboshisi O‘zbekiston Respublikasi Vazirlar Mahkamasining 2022-yil 11-martdagi 114-sonli qarori tahririda — Qonunchilik ma’lumotlari milliy bazasi, 12.03.2022-y., 09/22/114/0209-son)
Oldingi tahrirga qarang.
metrologiya xizmatlari uchun “Metrologiya to‘g‘risida”gi O‘zbekiston Respublikasi Qonunining 8-moddasiga asosan ushbu metrologiya xizmatining huquq va majburiyatlari O‘zbekiston texnik jihatdan tartibga solish agentligi bilan kelishib olinganligi to‘g‘risidagi ma’lumot.
(8-band O‘zbekiston Respublikasi Vazirlar Mahkamasining 2022-yil 11-martdagi 114-sonli qaroriga asosan oltinchi xatboshi bilan to‘ldirilgan — Qonunchilik ma’lumotlari milliy bazasi, 12.03.2022-y., 09/22/114/0209-son)
9. Ariza beruvchidan ushbu Nizomning 8-bandida nazarda tutilmagan hujjatlar va ma’lumotlar taqdim etilishini talab qilishga yo‘l qo‘yilmaydi.
Ariza beruvchi o‘z ixtiyoriga ko‘ra, akkreditatsiya obyektiga aloqador qo‘shimcha hujjatlar va ma’lumotlarni taqdim qilishi mumkin.
10. Markaz, taqdim etilgan hujjatlar va ma’lumotlarni to‘liqligi yuzasidan buyurtmani o‘rganadi. Buyurtmani o‘rganish ijobiy natija bersa, u ro‘yxatdan o‘tkaziladi va ikki ish kunidan kechikmay akkreditatsiya xizmatlarini ko‘rsatish bo‘yicha shartnoma (keyingi o‘rinlarda shartnoma deb ataladi) tayyorlanadi va ariza beruvchiga yuboriladi.
Ushbu Nizomning 8-bandida nazarda tutilgan barcha hujjatlar va ma’lumotlar taqdim etilmagan taqdirda, Markaz bir ish kunidan kechikmay ariza beruvchiga hujjatlarni puxta ishlab chiqish uchun qaytarish haqida xabar qiladi.
11. Ariza beruvchi tomonidan to‘lov to‘langach, Markaz taqdim etilgan akkreditatsiya obyekti hujjatlarini ekspertizadan o‘tkazadi. Ekspertiza natijalari bo‘yicha kamchiliklar aniqlangan taqdirda, ularni bartaraf etish uchun Markaz joyida baholash o‘tkazishga qadar bu haqda akkreditatsiya obyektini xabardor qiladi. Ekspertizadan o‘tkazish muddati o‘n besh ish kunidan oshmasligi kerak.
Akkreditatsiya obyekti aniqlangan kamchiliklar to‘g‘risida xabarni qabul qilgandan so‘ng joyning o‘zida baholashni o‘tkazish uchun shartnoma imzolashni va keyingi akkreditatsiya jarayoni o‘tkazishni rad etish huquqiga ega va bu haqda Markazni yozma xabardor qiladi.
12. Taqdim etilgan hujjatlarni ekspertizadan o‘tkazish tugallanganidan so‘ng va akkreditatsiya obyekti joyining o‘zida baholashni o‘tkazish uchun to‘lov to‘langach, Markaz uch ish kuni davomida milliy va/yoki xalqaro baholovchilar va texnik ekspertlardan iborat baholash guruhini shakllantiradi.
13. Baholash guruhi tarkibi va baholash o‘tkaziladigan sana akkreditatsiya obyektining asoslangan takliflarini inobatga olgan holda, u bilan kelishib olinadi.
Baholash guruhi rahbari va tarkibi Markaz rahbarining yoki u tomonidan vakolat berilgan shaxsning buyrug‘i bilan tayinlanadi.
14. Akkreditatsiya obyektining akkreditatsiya talablari va shartlariga muvofiqligini, texnik jihatdan tartibga solish sohasidagi normativ hujjatlar talablariga muvofiqligini va akkreditatsiya obyekti so‘ralgan funksiyalarni bajara olish qobiliyatini baholash baholash guruhining asosiy vazifalari hisoblanadi.
15. Akkreditatsiya obyektini joyning o‘zida baholash muddatlari uning faoliyati xususiyatlarini, shuningdek, ularni ixtisoslashtirilgan (laboratoriya, tashxis, metrologiya, metodologik, ishlab chiqarish va texnologik) baholash zaruratini hisobga olgan holda Markaz tomonidan aniqlanadi. Bunda akkreditatsiya obyektini baholash muddati o‘n ish kunidan oshmasligi kerak.
16. Baholash tasdiqlangan rejaga muvofiq o‘tkaziladi. Baholash rejasi Markaz rahbari yoki u tomonidan vakolat berilgan shaxs tomonidan tasdiqlanadi. Buyruq va baholash rejasi akkreditatsiya obyektiga joyning o‘zida baholash o‘tkazishga qadar tanishish uchun taqdim etiladi.
17. Baholash guruhi akkreditatsiya obyektining akkreditatsiya sohasiga kiritilgan har bir so‘ralgan faoliyat yo‘nalishini baholaydi.
Akkreditatsiya obyekti joyning o‘zida baholash o‘tkazish uchun shart-sharoitlar, shu jumladan baholash guruhiga zarur ma’lumot, yozuvlar va hujjatlardan (shu jumladan, ichki audit natijalaridan) foydalanish, binolarga kirish hamda xodimlar malakasini baholash imkoniyatini yaratadi.
Xodimlar malakasini baholash ularning shaxsiy kartalarini o‘rgangan holda so‘ralgan sohadagi malakasi, tayyorgarligi, ma’lumotini, muvofiqlikni baholash bo‘yicha ko‘nikmalarini namoyish qilishini kuzatish va suhbatdan o‘tkazish orqali amalga oshiriladi.
Baholash guruhi laboratoriyalararo qiyosiy sinovlar natijalarini va o‘lchov vositalarini kalibrlash hamda taqqoslash tekshiruv natijalari, shuningdek, so‘ralgan sohalarda nazorat sinovlari o‘tkazilishini talab qilishga haqlidir.
Tarkibiga akkreditatsiya obyekti kiradigan yuridik shaxsda sifat menejmentining sertifikatlangan tizimini mavjudligi akkreditatsiya obyekti uchun bu boradagi akkrreditatsiya talablari va shartlari bajarilganining tasdig‘i bo‘la olmaydi.
18. Joyning o‘zida baholash o‘tkazish uchun shart-sharoit yaratib berilmagan holatda, baholash guruhi rahbari Markazga tegishli raport taqdim etishi shart, Markaz uning asosida baholash ishlarini bir oydan oshmaydigan muddatga to‘xtatib turish to‘g‘risida qaror qabul qiladi.
Akkreditatsiya obyekti ko‘rsatilgan muddatda joyning o‘zida baholash o‘tkazish uchun shart-sharoit yaratib bermasa, akkreditatsiya qilishga berilgan buyurtma bekor qilinadi.
19. Baholash yakunlari bo‘yicha baholash guruhining baholash davomida aniqlangan nomuvofiqliklarni (ular mavjud bo‘lganda) o‘z ichiga olgan hisoboti (keyingi o‘rinlarda hisobot deb ataladi) tuziladi.
Hisobot baholash guruhi a’zolari, shuningdek, o‘zining alohida fikrini (zarurat bo‘lganda) ifodalashga haqli bo‘lgan akkreditatsiya obyektining vakolatli vakili tomonidan imzolanadi.
Hisobot ikki nusxada tuziladi, uning bir nusxasi akkreditatsiya obyektining vakolatli vakiliga beriladi.
20. Baholash guruhi ijobiy hisobot rasmiylashtirgan taqdirda (nomuvofiqlik mavjud bo‘lmaganda), uch ish kuni mobaynida hisobotni Akkreditatsiya komissiyasining tegishli qarorini qabul qilish uchun Markazga taqdim etadi.
21. Baholash vaqtida nomuvofiqliklar bartaraf etilmasa (shu jumladan, hujjatlarni ekspertizadan o‘tkazish natijasida aniqlangan nomuvofiqliklar), akkreditatsiya obyekti nomuvofiqliklarni bartaraf etishga doir harakatlar rejasini ishlab chiqadi va Markazga taqdim etadi. Bunda nomuvofiqliklarni bartaraf etish muddati baholash bo‘yicha hisobot rasmiylashtirilgan sanadan boshlab ikki oydan oshmasligi kerak.
Akkreditatsiya obyekti asoslangan sabablarni yozma ravishda Markazga taqdim etgan taqdirda, nomuvofiqliklarni bartaraf etish muddati Markaz tomonidan bir marotaba bir oydan ko‘p bo‘lmagan muddatga surilishi mumkin.
22. Akkreditatsiya obyekti tomonidan harakatlar rejasini bajarish to‘g‘risidagi ma’lumotlar va nomuvofiqliklar bartaraf etilganligini tasdiqlovchi hujjatlar belgilangan muddatda taqdim etilmasa, baholash guruhi rahbari hisobotni ilova qilgan holda, akkreditatsiya bo‘yicha ishlarni tugatish to‘g‘risida Markazga raport taqdim etishi shart.
23. Markaz harakatlar rejasini bajarish to‘g‘risidagi ma’lumot va nomuvofiqliklar bartaraf etilganligini tasdiqlovchi hujjatlarni qabul qilgan sanadan boshlab, besh ish kuni mobaynida akkreditatsiya obyekti tomonidan nomuvofiqliklar amalda bartaraf etilganligi holatini, zarur bo‘lsa, joyning o‘ziga borgan holda o‘rganish uchun buyruq bilan baholash guruhiga vakolat beradi.
Baholash guruhi besh ish kuni mobaynida qabul qilingan harakatlarni ko‘rib chiqishni ta’minlaydi. Agar taqdim etilgan ma’lumot va tasdiqlovchi hujjatlar nomuvofiqliklarni bartaraf etish uchun yetarli bo‘lmasa, baholash guruhi qo‘shimcha ma’lumot so‘rashga haqli.
Nomuvofiqliklarning amalda bartaraf etilganlik holatini o‘rganish muddati harakatlar rejasini bajarish to‘g‘risidagi ma’lumot va nomuvofiqliklar bartaraf etilganligini tasdiqlovchi hujjatlar taqdim etilgan sanadan boshlab o‘n ish kunidan oshmasligi kerak.
24. Baholash guruhi, nomuvofiqliklarning amalda bartaraf etilganlik holatini o‘rganish natijalari bo‘yicha yakuniy hisobotni rasmiylashtiradi va uch ishi kuni mobaynida Markazga taqdim etadi.
25. Markaz, hisobotni qabul qilgan sanadan boshlab, besh ish kuni mobaynida akkreditatsiya komissiyasi majlisida uning ko‘rib chiqilishini ta’minlaydi. Akkreditatsiya komissiyasi tarkibi Markaz direktorining buyrug‘i bilan tasdiqlanadi.
26. Quyidagilar Akkreditatsiyani rad etish to‘g‘risida qaror qabul qilish uchun asos hisoblanadi:
akkreditatsiya obyekti u baholanayotganda zarur ma’lumotlarni taqdim etishni rad etishi;
Oldingi tahrirga qarang.
akkreditatsiya obyekti tomonidan ko‘rsatilgan ma’lumotlarda noto‘g‘ri ma’lumot mavjudligi;
(26-bandning uchinchi xatboshisi O‘zbekiston Respublikasi Vazirlar Mahkamasining 2022-yil 11-martdagi 114-sonli qarori tahririda — Qonunchilik ma’lumotlari milliy bazasi, 12.03.2022-y., 09/22/114/0209-son)
akkreditatsiya obyektining akkreditatsiya talablari va shartlariga nomuvofiqligi;
aniqlangan nomuvofiqliklarni belgilangan muddatlarda bartaraf etmaslik.
Akkreditatsiyani rad etish to‘g‘risida boshqa asoslar, shu jumladan maqsadga muvofiqsizlik sabablari bo‘yicha qaror qabul qilishga yo‘l qo‘yilmaydi.
Oldingi tahrirga qarang.
Mazkur bandning uchinchi xatboshiga muvofiq akkreditatsiya obyekti tomonidan taqdim etilgan haqiqiy holatlar to‘g‘risidagi hujjatlar va ma’lumotlar aksi isbotlanmaguniga qadar ishonchli hisoblanadi.
Markazda taqdim etilgan hujjatlar va ma’lumotlarning haqiqiyligiga shubha paydo bo‘lgan taqdirda, akkreditatsiya obyektidan qo‘shimcha ma’lumotlar talab etmagan holda, Markaz ularning ishonchliligini mustaqil ravishda va o‘z hisobidan tekshirish uchun choralar ko‘radi.
(26-band O‘zbekiston Respublikasi Vazirlar Mahkamasining 2022-yil 11-martdagi 114-sonli qaroriga asosan xatboshilar bilan to‘ldirilgan — Qonunchilik ma’lumotlari milliy bazasi, 12.03.2022-y., 09/22/114/0209-son)
27. Akkreditatsiya komissiyasi tomonidan ijobiy qaror qabul qilinsa, Markaz va akkreditatsiya obyekti o‘rtasida akkreditatsiyadan keyingi shartnoma tuziladi hamda uch ish kuni mobaynida akkreditatsiya to‘g‘risida guvohnoma beriladi.
Akkreditatsiyadan keyingi shartnomada quyidagilar aks etadi:
Markaz va akkreditatsiya obyekti o‘rtasidagi o‘zaro munosabatlar, shu jumladan tomonlarning huquqlari, majburiyatlari va javobgarligi;
akkreditatsiya belgisini qo‘llash shartlari va davlat reyestri raqamidan foydalanish;
inspeksiya nazoratini o‘tkazish davriyligi.
28. Uchinchi tomon hisoblangan sinov, kalibrlash va tibbiy laboratoriyaga (markazga), metrologik xizmatga, texnik jihatdan vakolat va mustaqillik yuzasidan akkreditatsiya to‘g‘risida guvohnoma beriladi.
Birinchi yoki ikkinchi tomon hisoblangan sinov, kalibrlash va tibbiy laboratoriyaga (markazga), metrologik xizmatga texnik jihatdan vakolat yuzasidan akkreditatsiya to‘g‘risida guvohnoma beriladi.
29. Markaz o‘zining rasmiy veb-saytida akkreditatsiyadan o‘tkazilgan muvofiqlikni baholash organlari, metrologiya xizmatlari davlat reyestrini (keyingi o‘rinlarda Davlat reyestrlari deb ataladi), shuningdek, baholovchilar va texnik ekspertlar reyestrini yuritadi.
Akkreditatsiya to‘g‘risidagi guvohnoma muvofiqlikni baholash organlarining davlat reyestrida ro‘yxatdan o‘tkaziladi.
Davlat reyestrlari tanishish uchun ochiq hisoblanadi.
Oldingi tahrirga qarang.
30. Akkreditatsiya to‘g‘risidagi guvohnoma blankalari qat’iy hisobot yuritiladigan blankalar hisoblanadi, ularni ro‘yxatga olish va saqlash tartibi qonunchilikda belgilangan tartibda amalga oshiriladi.
(30-band O‘zbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik ma’lumotlari milliy bazasi, 05.04.2022-y., 09/22/153/0266-son)
31. Akkreditatsiya to‘g‘risidagi guvohnoma besh yil muddatga beriladi.
32. Akkreditatsiya komissiyasi salbiy qaror qabul qilganda, Markaz akkreditatsiyani rad etish to‘g‘risidagi qaror qabul qilingan sanadan boshlab, uch ish kuni mobaynida akkreditatsiya obyektiga yozma shaklda xabarnoma yuboradi.
33. Akkreditatsiya obyekti akkreditatsiya komissiyasining akkreditatsiyadan o‘tkazishni rad etish to‘g‘risidagi qarori ustidan Markaz huzuridagi apellatsiya komissiyasiga yoki sud tartibida shikoyat qilish huquqiga ega.
34. Quyidagi hollarda akkreditatsiya obyekti takroriy akkreditatsiyaga buyurtmanoma taqdim etishi kerak:
akkreditatsiya to‘g‘risidagi guvohnomaning amal qilish muddati tugashidan kamida uch oy oldin;
akkreditatsiya obyektining vakolatini baholashga qo‘yiladigan talablarni tartibga soluvchi texnik jihatdan tartibga solish sohasidagi yangi yoki yangidan qabul qilingan normativ hujjat amalga kiritilgan vaqtdan boshlab uch oydan ko‘p bo‘lmagan muddatda.
Takroriy akkreditatsiya ushbu Nizomning 3-bobida belgilangan tartibda o‘tkaziladi.
35. Markaz avval berilgan akkreditatsiya to‘g‘risidagi guvohnomaning amal qilish muddatini tegishli qaror qabul qilinadigan sanagacha uzaytirishi mumkin, bunda uzaytirish muddati ushbu Nizom 34-bandi talablariga rioya qilgan holda, uch oydan oshmasligi kerak.
4-bob. Akkreditatsiya sohasini kengaytirish va qisqartirish
36. Akkreditatsiya sohasini kengaytirish ishlari akkreditatsiya obyekti arizasi bo‘yicha ushbu Nizomning 7 — 25, 32 va 33-bandlarida nazarda tutilgan tartibda amalga oshiriladi.
37. Akkreditatsiya obyektining akkreditatsiya sohasini qisqartirish akkreditatsiya komissiyasining qarori bilan quyidagilar asosida amalga oshiriladi:
akkreditatsiya sohasini qisqartirish to‘g‘risida akkreditatsiya obyektining arizasi;
akkreditatsiya obyekti faoliyatining inspeksiya nazorati natijalariga ko‘ra.
38. Akkreditatsiya sohasi qisqartirilsa, Markaz tomonidan akkreditatsiya obyektining akkreditatsiya sohasiga tegishli o‘zgartirishlar kiritiladi.
Akkreditatsiya sohasini qisqartirish uchun haq olinmaydi.
5-bob. Inspeksiya nazorati
39. Inspeksiya nazorati akkreditatsiyadan keyingi shartnoma asosida ushbu Nizomga 2-ilovada keltirilgan sxemaga muvofiq joyning o‘ziga borib amalga oshiriladi.
Birinchi inspeksiya nazorati akkreditatsiya sanasidan keyin o‘n ikki oydan kechikmay o‘tkaziladi. Keyingi inspeksiya nazorati har yili Markaz rahbari tomonidan tasdiqlanadigan inspeksiya nazorati reja-jadvaliga muvofiq davriy, biroq avvalgi inspeksiya nazorati o‘tkazilgan vaqtdan boshlab yigirma to‘rt oydan kechikmay (mahsulotni sertifikatlash organlari uchun — o‘n ikki oydan kechikmay) o‘tkaziladi.
40. Yigirma to‘rt oy davriylik muddati quyidagi shartlar bajarilsa belgilanadi:
joyning o‘zida avvalgi baholash o‘tkazilganda nomuvofiqliklar bo‘lmagan bo‘lsa;
akkreditatsiya obyekti faoliyati bo‘yicha shikoyatlar bo‘lmagan bo‘lsa;
akkreditatsiya obyekti faoliyati bo‘yicha o‘tkazilgan monitoring ijobiy natijalar bergan bo‘lsa.
41. Akkreditatsiya obyekti faoliyati bo‘yicha rejadan tashqari inspeksiya nazorati akkreditatsiya talablari va shartlari, shu jumladan akkreditatsiya belgisidan foydalanish buzilganligi to‘g‘risida hujjatlar bilan tasdiqlangan yozma murojaat Markazga tushgan taqdirda o‘tkaziladi.
42. Inspeksiya nazoratini o‘tkazish tartibi ushbu Nizomning 13 — 17, 19-bandlariga muvofiq amalga oshiriladi.
Inspeksiya nazorati davomida Markaz muvofiqlikni baholash organlari va metrologiya xizmatlari tomonidan akkreditatsiya belgisini va/yoki akkreditatsiyaga matnli havolalar qo‘llanilishining to‘g‘riligini ham o‘rganadi. Muvofiqlikni baholash organlari va metrologiya xizmatlari tomonidan akkreditatsiya belgisini qo‘llash qoidalari Markaz tomonidan ISO/IEC 17011 xalqaro standarti talablariga muvofiq belgilanadi.
43. Baholash guruhi uch ish kuni mobaynida Markazga o‘tkazilgan inspeksiya nazorati to‘g‘risida hisobot taqdim etishi kerak.
44. Markaz o‘tkazilgan inspeksiya nazorati to‘g‘risidagi hisobotni qabul qilgandan keyin besh ish kuni mobaynida uning akkreditatsiya komissiyasi majlisida ko‘rib chiqilishini ta’minlaydi.
Akkreditatsiya komissiyasi:
akkreditatsiya to‘g‘risidagi guvohnomaning amal qilishini tasdiqlash;
akkreditatsiya to‘g‘risidagi guvohnomaning amal qilishini to‘xtatib turish;
akkreditatsiya to‘g‘risidagi guvohnomaning amal qilishini tugatish;
komissiya a’zolarining katta qismi baholash guruhi hisobotiga qo‘shilmagan taqdirda, akkreditatsiya obyekti akkreditatsiya talablari va shartlariga muvofiqligini haq olmasdan qo‘shimcha baholashni o‘tkazish to‘g‘risida qaror qabul qiladi.
Akkreditatsiya komissiyasining qarori u qabul qilingandan keyin akkreditatsiya obyektiga bir ish kunidan kechikmay yetkaziladi.
45. Akkreditatsiya to‘g‘risidagi guvohnomaning amal qilishini to‘xtatib turish (tiklash) yoki tugatish ushbu Nizomning 6-7-boblarida belgilangan tartibda amalga oshiriladi.
46. Akkreditatsiya komissiyasining akkreditatsiya to‘g‘risidagi guvohnomaning amal qilishini to‘xtatib turish yoki tugatish to‘g‘risidagi qarori yuzasidan Markaz huzuridagi apellatsiya komissiyasiga yoki sud tartibida shikoyat qilish mumkin.
6-bob. Akkreditatsiya to‘g‘risidagi guvohnomaning amal qilishini to‘xtatib turish (tiklash)
47. Akkreditatsiya to‘g‘risidagi guvohnomaning amal qilishi quyidagi hollarda to‘xtatib turilishi mumkin:
Akkreditatsiya obyekti akkreditatsiya to‘g‘risidagi guvohnomaning amal qilishini to‘xtatib turish to‘g‘risida ariza bilan murojaat qilganida;
akkreditatsiya talablari va shartlari buzilishi aniqlanganda;
akkreditatsiya obyekti tomonidan akkreditatsiyadan keyingi shartnoma qoidalariga rioya etilmaganda.
48. Akkreditatsiya to‘g‘risidagi guvohnomaning amal qilishini to‘xtatib turish ushbu Nizom 47-bandining uchinchi va to‘rtinchi xatboshilarida nazarda tutilgan hollarda Markaz tomonidan akkreditatsiya komissiyasi qaroriga ko‘ra, uch oydan oshmaydigan muddatda amalga oshiriladi.
Akkreditatsiya to‘g‘risidagi guvohnomaning amal qilishini to‘xtatib turish ushbu Nizom 47-bandining ikkinchi xatboshida nazarda tutilgan holda Markaz tomonidan amalga oshiriladi.
Akkreditatsiya to‘g‘risidagi guvohnomaning amal qilishini to‘xtatib turish to‘g‘risidagi ma’lumot qaror qabul qilingan kundan boshlab bir ish kunidan kechikmay, Markazning veb-saytida joylashtiriladi va akkreditatsiya obyektiga yozma ravishda xabar yuboriladi.
Akkreditatsiya to‘g‘risidagi guvohnomaning amal qilishi akkreditatsiya komissiyasining qabul qilgan qarori to‘g‘risida ma’lumot Markazning veb-saytida joylashtirilgan sanadan boshlab to‘xtatib turiladi.
Akkreditatsiya obyekti akkreditatsiya to‘g‘risidagi guvohnomaning amal qilishi tiklangunga qadar muvofiqlikni baholash faoliyatini to‘xtatib turishi shart.
49. Akkreditatsiya obyekti nomuvofiqliklarni bartaraf etish bo‘yicha harakatlar rejasini ishlab chiqadi va Markazga taqdim etadi. Bunda nomuvofiqliklarni bartaraf etish muddati akkreditatsiya komissiyasining qaroriga asosan Markaz tomonidan belgilangan muddatdan oshmasligi kerak.
50. Akkreditatsiya obyekti tomonidan harakatlar rejasini bajarish to‘g‘risidagi ma’lumot va nomuvofiqliklar bartaraf etilganligini tasdiqlovchi hujjatlar belgilangan muddatda taqdim etilmasa, baholash guruhi rahbari Markazga akkreditatsiya to‘g‘risidagi guvohnomani amal qilishini tugatish kerakligi to‘g‘risida raport taqdim etadi.
51. Nomuvofiqliklarni bartaraf etilganligi holatlarini o‘rganish, ushbu Nizomning 23 va 24-bandlariga muvofiq amalga oshiriladi.
52. Markaz baholash guruhi tomonidan yakuniy hisobot taqdim etilganidan so‘ng besh ish kuni mobaynida tegishli qaror qabul qilish uchun akkreditatsiya komissiyasining majlisida uning ko‘rib chiqilishini ta’minlaydi.
53. Akkreditatsiya komissiyasining qarori u qabul qilingan kundan e’tiboran uch ish kundan kechikmay Markaz tomonidan akkreditatsiya obyektiga yetkaziladi.
54. Akkreditatsiya to‘g‘risidagi guvohnomaning amal qilishini to‘xtatib turish va tiklash to‘g‘risidagi ma’lumotlar akkreditatsiya sohasidagi tegishli Davlat reyestrlariga kiritilishi va Markazning veb-saytida joylashtirilishi lozim.
7-bob. Akkreditatsiya to‘g‘risidagi guvohnomaning amal qilishini tugatish
55. Akkreditatsiya to‘g‘risidagi guvohnomaning amal qilishi quyidagi hollarda tugatilishi mumkin:
akkreditatsiya obyekti akkreditatsiya to‘g‘risidagi guvohnomaning amal qilishini tugatish to‘g‘risida ariza bilan murojaat qilsa;
yuridik shaxs (akkreditatsiya obyekti) tugatilsa;
akkreditatsiya obyekti tomonidan guvohnoma amal qilishining to‘xtatib turilishiga sabab bo‘lgan holatlar Markaz tomonidan belgilangan muddatda bartaraf etilmasa;
akkreditatsiya sohasi buzilsa;
guvohnoma soxta hujjatlar va ma’lumotlardan foydalangan holda olinganligi aniqlangan bo‘lsa.
56. Akkreditatsiya to‘g‘risidagi guvohnomaning amal qilishi akkreditatsiya komissiyasining qaroriga ko‘ra Markaz tomonidan tugatiladi.
Akkreditatsiya to‘g‘risidagi guvohnomaning amal qilishini tugatish to‘g‘risidagi ma’lumot qaror qabul qilingan kundan boshlab bir ish kunidan kechikmay Markazning veb-saytida joylashtiriladi va akkreditatsiya obyektiga yozma ravishda xabar yuboriladi.
Akkreditatsiya to‘g‘risidagi guvohnomasining amal qilishi akkreditatsiya komissiyasining qabul qilgan qarori to‘g‘risida ma’lumot Markazning veb-saytida joylashtirilgan sanadan boshlab tugatiladi.
55-bandning to‘rtinchi — oltinchi xatboshilariga muvofiq akkreditatsiya to‘g‘risidagi guvohnomaning amal qilishi tugutilgandan keyin akkreditatsiya uchun takroriy ariza kamida olti oydan keyin berilishi mumkin.
57. Akkreditatsiya to‘g‘risidagi guvohnomaning amal qilishini tugatish to‘g‘risidagi ma’lumotlar akkreditatsiya sohasidagi tegishli Davlat reyestrlariga kiritilishi lozim.
8-bob. Akkreditatsiya belgisidan foydalanish monitoringini amalga oshirish
58. Akkreditatsiya belgisidan foydalanish monitoringi muvofiqlikni baholash organlari va metrologik xizmatlar tomonidan akkreditatsiya belgisidan foydalanish qoidalariga (akkreditatsiyaga matnli havolalar) rioya qilishning holatini o‘rganish maqsadida akkreditatsiyadan keyingi shartnoma asosida amalga oshiriladi.
Monitoring:
Markaz tomonidan muvofiqlikni baholash organlari va metrologiya xizmatlaridan vaqti-vaqti bilan so‘raladigan akkreditatsiya qilingan sohada ularning faoliyati to‘g‘risidagi axborot;
iste’molchilarning muvofiqlikni baholash organlari va metrologiya xizmatlari sifatidan qoniqishi to‘g‘risidagi so‘rov natijalarini iste’molchilar bilan qayta aloqa orqali;
Markazning so‘rovi bo‘yicha nazorat organlari tomonidan taqdim etiladigan ma’lumotlarni tahlil qilish orqali amalga oshiriladi.
59. Monitoring natijalari bo‘yicha Markaz uch ish kuni mobaynida muvofiqlikni baholash organi va metrologiya xizmatini ular tomonidan tegishli chora-tadbirlar ko‘rish uchun monitoring natijalari to‘g‘risida xabardor qiladi.
Bunda monitoring natijalari bo‘yicha Markaz tomonidan muvofiqlikni baholash organi va metrologiya xizmati organiga nisbatan biron-bir chora ko‘rilishiga yo‘l qo‘yilmaydi.
Monitoring natijalaridan inspeksiya nazorati davomida foydalanilishi mumkin.
9-bob. Akkreditatsiya sohasidagi Markaz xizmatlariga haq to‘lash tartibi
60. Markaz tomonidan akkreditatsiya sohasidagi quyidagi xizmatlar uchun haq undiriladi:
hujjatlar ekspertizasi uchun;
akkreditatsiya obyektini baholash uchun;
tasdiqlangan reja-jadvalga muvofiq o‘tkazilgan akkreditatsiya obyektining inspeksiya nazorati uchun;
akkreditatsiya sohasini dolzarblashtirish uchun.
Akkreditatsiya obyektlari tomonidan akkreditatsiya sohasidagi Markaz xizmatlariga haq to‘lash ularning natijalaridan qat’i nazar amalga oshiriladi.
61. Markaz tomonidan akkreditatsiya sohasidagi quyidagi xizmat turlari bo‘yicha haq undirilmaydi:
ariza ko‘rib chiqish;
oldin berilgan (amaldagi) akkreditatsiya to‘g‘risidagi guvohnomani qayta rasmiylashtirish;
akkreditatsiya to‘g‘risidagi guvohnomaning amal qilishini to‘xtatib turish (tiklash) yoki tugatish;
akkreditatsiya sohasini qisqartirish;
akkreditatsiya obyekti faoliyatining rejadan tashqari inspeksiya nazoratini amalga oshirish;
ushbu Nizomning 69-bandi uchinchi va to‘rtinchi xatboshilarida nazarda tutilgan materiallar dolzarblashtirilganligi uchun.
62. Ushbu Nizomda nazarda tutilgan xizmatlar uchun to‘lovlar Markazning sarflangan vaqtidan kelib chiqqan holda belgilanadi.
Sarflangan vaqtni hisoblab chiqish metodikasi Markaz tomonidan belgilanadi va uning rasmiy veb-saytiga joylashtiriladi.
Oldingi tahrirga qarang.
63. Muvofiqlikni baholash organlari va metrologiya xizmatlari tomonidan akkreditatsiya belgisi qo‘llanishi uchun qonunchilikda belgilangan miqdori haq undiriladi.
(63-band O‘zbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik ma’lumotlari milliy bazasi, 05.04.2022-y., 09/22/153/0266-son)
10-bob. Akkreditatsiya to‘g‘risidagi guvohnomani qayta rasmiylashtirish
64. Akkreditatsiya obyekti qayta tashkil etilsa, nomi, yuridik manzili yoki joylashgan joyi (pochta manzili) o‘zgarsa, yigirma ish kuni mobaynida mazkur o‘zgartishlar haqida oldin berilgan (amaldagi) akkreditatsiya to‘g‘risidagi guvohnomaning asl nusxasini ilova qilib, uni qayta rasmiylashtirish uchun Markazni yozma ravishda xabardor qilishi kerak.
65. Agar akkreditatsiya obyekti ilgari akkreditatsiyadan o‘tkazilgan akkreditatsiya obyektining huquqiy vorisi bo‘lmasa, hujjatlarni ko‘rib chiqish bilan bog‘liq keyingi tartib-taomillar ushbu Nizomning 3-bobida nazarda tutilgan tartibda o‘tkaziladi.
66. Akkreditatsiyadan o‘tgan mahsulotlar, xizmatlar, menejment tizimlari, xodimlarni sertifikatlash organi va inspeksiya organining nomi yoki joylashgan joyi (pochta manzili) o‘zgarsa, yangi akkreditatsiya to‘g‘risidagi guvohnoma akkreditatsiya o‘tkazilmay, amaldagi akkreditatsiya muddatiga rasmiylashtiriladi.
67. Sinov, kalibrlash va tibbiy laboratoriya (markaz) yoki metrologiya xizmati joylashgan joy o‘zgarsa, ushbu Nizomning 3-bobida nazarda tutilgan tartibda ular takroriy akkreditatsiyadan o‘tkaziladi.
68. Yangi akkreditatsiya to‘g‘risidagi guvohnoma Markaz tomonidan uch ish kuni mobaynida rasmiylashtiriladi.
11-bob. Akkreditatsiya obyekti materiallarini dolzarblashtirish
69. Akkreditatsiya obyekti materiallari quyidagi hollarda dolzarblashtiriladi:
akkreditatsiya obyektining akkreditatsiya sohasida ko‘rsatilgan texnik jihatdan tartibga solish sohasidagi normativ hujjatlar o‘rniga yangisi amalga kiritilsa, ularga o‘zgartishlar, qo‘shimchalar kiritilsa (bundan qabul qilinayotgan normativ hujjatda mahsulotlarning yangi turlari, sinov (o‘lchov) usullari ko‘rsatilgan hollar mustasno);
sifat bo‘yicha qo‘llanmaga va sifat menejmenti tizimi tartib-tamoyil hujjatlariga o‘zgartirishlar kiritilsa;
akkreditatsiya obyektining xodimlari tarkibi o‘zgarsa.
70. Akkreditatsiya materiallari dolzarblashtirilsa, akkreditatsiya obyektlari buning sabablarini ko‘rsatgan holda, o‘zgartirishlar kiritilgan hujjatlarni, shuningdek, kiritilayotgan o‘zgartishlar yuzasidan qiyosiy tahlilni ilova qilib Markazga ariza taqdim etadi.
71. Markaz o‘n besh ish kuni mobaynida taqdim etilgan hujjatlarni ko‘rib chiqadi va avval tasdiqlangan hujjatlarga tegishli o‘zgartirishlar kiritadi. Ushbu Nizomning 69-bandi ikkinchi xatboshiga muvofiq materiallar dolzarblashtirilgan taqdirda, akkreditatsiya obyektning akkreditatsiya sohasi yangi tahrirda tasdiqlanadi.
12-bob. Apellatsiyalarni ko‘rib chiqish
Oldingi tahrirga qarang.
72. Akkreditatsiya obyekti akkreditatsiya yoki inspeksiya nazorati natijalari bo‘yicha akkreditatsiya komissiyasining unga nisbatan salbiy qarori chiqarilsa, akkreditatsiya komissiyasining qarori qabul qilingan sanadan boshlab o‘ttiz kalendar kuni mobaynida Markazga yozma shaklda apellatsiya berish huquqiga ega.
Apellatsiya komissiyasining qarori qabul qilingan sanadan boshlab o‘ttiz kalendar kundan ortiq muddatda berilgan apellatsiyalar ko‘rib chiqilmaydi.
(72-band O‘zbekiston Respublikasi Vazirlar Mahkamasining 2022-yil 11-martdagi 114-sonli qarori tahririda — Qonunchilik ma’lumotlari milliy bazasi, 12.03.2022-y., 09/22/114/0209-son)
73. Apellatsiya komissiyasi har bir apellatsiyani ko‘rib chiqish uchun zaruratga ko‘ra shakllantiriladi. Apellatsiya komissiyasi tarkibi Markaz direktorining buyrug‘i bilan tasdiqlanadi. Apellatsiya komissiyasi tarkibini shakllantirish va tasdiqlash muddatlari apellatsiya olingan kundan boshlab uch kundan ortiq bo‘lmasligi kerak.
74. Apellatsiya komissiyasining tarkibi, baholovchilar, jalb qilinadigan texnik ekspertlar, shu jumladan xalqaro ekspertlar orasidan apellatsiya bergan akkreditatsiya obyektini baholashda ishtirok etmagan va akkreditatsiya komissiyasi tarkibida bo‘lmagan Markazning kamida uch vakilidan shakllantiriladi.
75. Markaz apellatsiya bergan akkreditatsiya obyektini va baholashni o‘tkazgan guruh rahbarini apellatsiya ko‘rib chiqiladigan sana haqida xabardor qiladi. Apellatsiya bergan akkreditatsiya obyekti vakili va guruh rahbari apellatsiyani ko‘rib chiqishda ishtirok etishlari mumkin.
76. Apellatsiya komissiyasi berilgan apellatsiyani ko‘rib chiqadi va qabul qilingan qaror to‘g‘risida akkreditatsiya obyektiga yozma ravishda ma’lum qiladi. Apellatsiyani ko‘rib chiqish muddati u berilgan sanadan boshlab o‘n kalendar kundan oshmasligi kerak.
77. Ko‘rib chiqilgan apellatsiya natijalari bo‘yicha apellatsiya komissiyasi quyidagi qarorlardan birini qabul qiladi:
akkreditatsiya komissiyasining qarorini o‘zgarishsiz qoldirish va apellatsiyani qanoatlantirishni rad etish;
apellatsiyani qanoatlantirish.
78. Akkreditatsiya komissiyasining qarorini o‘zgarishsiz qoldirish va apellatsiyani qanoatlantirishni rad etish to‘g‘risidagi qaror agar:
apellatsiya ushbu Nizom talablari buzilgan holda taqdim etilgan bo‘lsa;
apellatsiyada keltirilgan sabablar tasdiqlanmasa qabul qilinadi.
79. Apellatsiyani qanoatlantirish to‘g‘risidagi qaror qabul qilinsa, Markaz tomonidan akkreditatsiya to‘g‘risidagi guvohnomani berish yoki akkreditatsiya to‘g‘risidagi guvohnomaning amal qilishini tasdiqlash haqida qaror qabul qilinadi.
80. Markaz ikki ish kunidan ortiq bo‘lmagan muddatda qabul qilingan qaror to‘g‘risidagi xabarnomani apellatsiya bergan akkreditatsiya obyektiga yozma shaklda yuboradi.
81. Aynan bir masala bo‘yicha apellatsiyani takroran berishga yo‘l qo‘yilmaydi.
Oldingi tahrirga qarang.
82. Apellatsiya komissiyasining qarori yuzasidan qonunchilikda belgilangan tartibda sudga shikoyati qilish mumkin.
(82-band O‘zbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik ma’lumotlari milliy bazasi, 05.04.2022-y., 09/22/153/0266-son)
13-bob. Yakunlovchi qoida
Oldingi tahrirga qarang.
83. Ushbu Nizom talablari buzilishida aybdor bo‘lgan shaxslar qonunchilikka muvofiq javob beradilar.
(83-band O‘zbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik ma’lumotlari milliy bazasi, 05.04.2022-y., 09/22/153/0266-son)
Muvofiqlikni baholash organlarini akkreditatsiyadan o‘tkazish tartibi to‘g‘risidagi nizomga
1-ILOVA
Akkreditatsiyani o‘tkazish sxemasi

Bosqichlar

Subyektlar

Tadbirlar

Bajarish
muddatlari


1-bosqich

Ariza
beruvchi

Akkreditatsiya olish uchun zarur bo‘lgan tegishli hujjatlarni tayyorlaydi.

Akkreditatsiya markaziga bevosita, olinganligi to‘g‘risidagi bildirishnoma bilan pochta aloqasi vositasi orqali yoki elektron shaklda zarur hujjatlarni ilova qilgan holda buyurtmanomani taqdim etadi.

Ariza beruvchining xohishiga ko‘ra


2-bosqich

Akkreditatsiya markazi

1. Taqdim etilgan hujjatlar va ma’lumotlarning to‘liqligi yuzasidan buyurtmanomani o‘rganadi:

a) ijobiy natija bo‘lganda akkreditatsiya bo‘yicha xizmatlar ko‘rsatish to‘g‘risida shartnoma tayyorlanadi;

b) hujjatlar to‘liq bo‘lmagan taqdirda — hujjatlarni qaytaradi.



a) 2 ish kuni mobaynida


b) 1 ish kuni mobaynida

2. Markaz xizmatlariga haq to‘langandan keyin taqdim etilgan hujjatlarni ekspertizadan o‘tkazadi.

2. 15 ish kuni mobaynida


3. 3 ish kuni mobaynida



4-5. Bir oygacha (akkreditatsiya obyekti tayyorligi natijalari bo‘yicha)

3. Ekspertiza natijalari bo‘yicha kamchiliklar aniqlangan taqdirda, joyning o‘zida baholash o‘tkazishdan avval markaz bu haqda akkreditatsiya obyektini ularni bartaraf etish uchun xabardor qiladi.

4. Taqdim etilgan hujjatlarni ekspertizadan o‘tkazish tugallangandan keyin baholovchi guruhni tuzadi.

5. Joyning o‘zida baholash uchun shart-sharoitlar ta’minlanmagan taqdirda, Markaz baholash ishini to‘xtatib turadi.

Baholash
guruhi

6. Joyning o‘zida baholaydi va natijalar bo‘yicha baholash to‘g‘risidagi hisobotni rasmiylashtiradi.

10 ish kuni mobaynida

7. Ijobiy hisobot rasmiylashtirilgan taqdirda u akkreditatsiya komissiyasining majlisida ko‘rib chiqish uchun Markazga beriladi.

3 ish kuni mobaynida


3-bosqich*

Akkreditatsiya obyekti

1. Baholash guruhi tomonidan baholash to‘g‘risidagi hisobotni rasmiylashtirishda akkreditatsiya obyektining belgilangan talablarga nomuvofiqligi to‘g‘risidagi xulosa berilsa, nomuvofiqlikni bartaraf etish va uni bajarish to‘g‘risidagi hisobot bo‘yicha harakatlar rejasini ishlab chiqadi va Markazga taqdim etadi.

1. Ikki oy mobaynida (akkreditatsiya obyektining xohishiga ko‘ra)

Akkreditatsiya markazi

2. Harakatlar rejasi bajarilganligi to‘g‘risidagi axborot va nomuvofiqliklarni bartaraf etish bo‘yicha tasdiqlovchi hujjatlar olingan paytdan boshlab baholash guruhiga akkreditatsiya obyekti tomonidan nomuvofiqliklar bartaraf etilishi holatini o‘rganish uchun vakolat beradi.

2. 5 ish kuni mobaynida

Baholash guruhi

3. Amalga oshirilgan harakatlarning natijalarini o‘rganishni ta’minlaydi.

3. 5 ish kuni mobaynida

4. O‘rganish natijalari bo‘yicha baholash to‘g‘risidagi yakuniy hisobotni rasmiylashtiradi va uni akkreditatsiya komissiyasining majlisida ko‘rib chiqish uchun Markazga taqdim etadi.

4. 3 ish kuni mobaynida


4-bosqich

Akkreditatsiya markazi

1. Akkreditatsiya komissiyasining majlisida baholash natijalari ko‘rib chiqilishini ta’minlaydi.

1. 5 ish kuni mobaynida

2. Akkreditatsiya komissiyasi tomonidan ijobiy qaror qabul qilingan taqdirda Markaz bilan akkreditatsiya obyekti o‘rtasida akkreditatsiyadan keyingi shartnoma tuziladi va akkreditatsiya to‘g‘risida guvohnoma beriladi.

2-3. 3 ish kuni mobaynida

3. Akkreditatsiya komissiyasi tomonidan salbiy qaror qabul qilingan taqdirda akkreditatsiya obyektiga akkreditatsiya qilish rad etilganligi to‘g‘risida yozma bildirishnoma yuboriladi.

* 3-bosqich belgilangan talablarga nomuvofiqlik aniqlanganda va nomuvofiqliklarni bartaraf etish uchun muddat berilishi to‘g‘risida qaror qabul qilinganda bajariladi.
Muvofiqlikni baholash organlarini akkreditatsiyadan o‘tkazish tartibi to‘g‘risidagi nizomga
2-ILOVA
Inspeksiya nazoratini o‘tkazish
sxemasi

Bosqichlar

Subyektlar

Tadbirlar

Bajarish muddatlari


1-bosqich

Akkreditatsiya markazi

Inspeksiya nazoratini o‘tkazishning reja-jadvali asosida:

baholash guruhi tarkibini va inspeksiya nazoratini o‘tkazish muddatlarini ko‘rsatgan holda buyruq tuzadi;

inspeksiya nazoratini o‘tkazish rejasini tasdiqlaydi.

Reja-jadvalga muvofiq


2-bosqich

Baholash guruhi

1. Joyning o‘zida baholaydi va natijalar bo‘yicha baholash to‘g‘risidagi hisobotni rasmiylashtiradi.

10 ish kuni mobaynida

2. Hisobotni akkreditatsiya komissiyasi majlisida ko‘rib chiqish uchun Markazga beradi.

3 ish kuni mobaynida


3-bosqich

Akkreditatsiya markazi

1. Tegishli qaror qabul qilish uchun baholash natijalari akkreditatsiya komissiyasining majlisida ko‘rib chiqilishini ta’minlaydi.

5 ish kuni mobaynida

2. Akkreditatsiya komissiyasining qarori akkreditatsiya obyektiga yetkaziladi.

1 ish kuni mobaynida

Vazirlar Mahkamasining 2019-yil 24-apreldagi 349-son qaroriga
2-ILOVA
“O‘zbekiston standartlashtirish, metrologiya va sertifikatlashtirish agentligi huzuridagi “Akkreditatsiya markazi” DUKning Akkreditatsiya bo‘yicha Osiyo-Tinch okeani hamkorligi (ARAS), Laboratoriyalar akkreditatsiyasi bo‘yicha xalqaro tashkilot (ILAC) va Akkreditatsiya bo‘yicha xalqaro forumga (IAF) to‘laqonli a’zo sifatida kirishi bo‘yicha
TADBIRLAR REJASI

T/r

Tadbirlar nomi

Amalga oshirish shakli

Bajarish muddatlari

Mas’ullar

I. Muvofiqlikni baholash sohasidagi normativ-huquqiy bazani takomillashtirish

1.

Qonun hujjatlariga ISO/IEC 17000 seriyasi xalqaro standarti va Laboratoriyalar akkreditatsiyasi bo‘yicha xalqaro tashkilot (keyingi o‘rinlarda ILAC deb ataladi) va Akkreditatsiya bo‘yicha xalqaro forumi (keyingi o‘rinlarda IAF deb ataladi) talablariga muvofiq O‘zbekiston standartlashtirish, metrologiya va sertifikatlashtirish agentligi huzuridagi “Akkreditatsiya markazi” (keyingi o‘rinlarda Akkreditatsiya markazi deb ataladi) muvofiqlikni baholash organlarning akkreditatsiya va inspeksiya nazorati natijalari bo‘yicha mustaqil qaror qabul qilish huquqini berish yuzasidan o‘zgartirishlar kiritish.

O‘zbekiston Respublikasi Qonuni loyihasi

2019-yil

1-iyulgacha

“O‘zstandart”

agentligi

2.

ILAC va IAF tomonidan qabul qilingan standartlar bilan bir xil bo‘lgan akkreditatsiya sohasidagi asos bo‘luvchi xalqaro standartlarni amalga kiritish.

Idoraviy hujjatlar

2019-yil

1-iyulgacha

“O‘zst�ndart”

agentligi

II. Akkreditatsiya markazi faoliyatini takomillashtirish

3.

ISO/IEC 17011 xalqaro standarti talablari va tavsiyalariga muvofiq Akkreditatsiya markazida sifat menejment tizimini joriy etish va qo‘llab-quvvatlash.

Tartibot hujjatlari, yo‘riqnomalar va nizomlar

2019-yil
1-iyungacha

Akkreditatsiya
markazi

4.

Akkreditatsiya markazi mutaxassislari, akkreditatsiya qilingan obyektlar, professional institutlar, tartibga soluvchi organlar, mustaqil ekspertlar vakillaridan iborat bo‘lgan laboratoriyalar va sertifikatlash orga�larning akkreditatsiyasi bo‘yicha texnik qo‘mitalar tashkil etish.

Idora hujjatlari

2019-yil
1-iyungacha

Akkreditatsiya
markazi

5.

Akkreditatsiya markazini xalqaro ixtisoslashgan tashkilotlarga kirishga tayyorlash uchun xorijiy maslahatchilarni shartnoma asosida jalb etish.

Hamkorlik to‘g‘risida shartnoma

2019-2020
yillar

“O‘zstandart”
agentligi

6.

Akkreditatsiya markazini xorijiy tillarni egallagan va xalqaro maydonda respublikaning manfaatlarini ilgari surish salohiyatiga ega bo‘lgan malakali va yosh mutaxassislar bilan ta’minlash.

Mehnat bitimi

2019-yil
1-maygacha

Akkreditatsiya
markazi

III. Xalqaro ixtisoslashgan tashkilotlarga kirish bo‘yicha tayyorgarlik ishlari

7.

ILAC, IAF va akkreditatsiya bo‘yicha Osiyo-Tinch okeani hamkorligi (keyingi o‘rinlarda ARAS deb ataladi) talablariga muvofiq tartibot va majburiy hujjatlarni ishlab chiqish.

Idora hujjati

2019-yil

1 iyungacha

Akkreditatsiya
markazi

8.

Akkreditatsiya markazi faoliyatini ISO/IEC 17011 talablariga mosligini malakali xorijlik ekspertlarni jalb qilgan holda dastlabki tarzda baholash.

Xorijlik

ekspertlar hisoboti

2019-yil

1-sentabrgacha

Akkreditatsiya

markazi

9.

Xorijiy akkreditatsiya organlari vakillari bilan muvofiqlikni baholash organlarining qo‘shma sayyor baholashlarini o‘tkazish.

Baholash to‘g‘risida hisobot

2019-yil

1-sentabrgacha

(jadval bo‘yicha)

Akkreditatsiya
markazi

10.

Akkreditatsiya milliy tizimining baholash natijalarini olish va aniqlangan nomuvofiqliklarni bartaraf etish.

Xorijlik

ekspertlar hisoboti

2019-yil

1-noyabrgacha

Akkreditatsiya
markazi

11.

Akkreditatsiya markazi xodimlarini xorijlik ekspertlarni jalb qilgan holda ISO/IEC 17000 xalqaro standartlariga o‘qitish.

O‘qitish to‘g‘risida sertifikat

2019-yil

aprel — dekabr

Akkreditatsiya
markazi

12.

APAC, ILAC va IAF tadbirlarida Akkreditatsiya markazi vakillari ishtiroki hamda mazkur tashkilotlar ekspertlari tomonidan baholashni tashkil etish bo‘yicha muzokaralar olib borish.

APAC, ILAC va IAF tadbirlarida ishtirok etish to‘g‘risida hisobot

2019-2020-yillar

Akkreditatsiya
markazi

IV. Muvofiqlikni baholash milliy organlari faoliyati darajasini oshirish

13.

Muvofiqlikni baholash organlarini belgilangan tartibda ISO/IEC 17000 xalqaro standartlari (oxirgi tahririda) talablariga muvofiq baholash.

Akkreditatsiya to‘g‘risidagi guvohnoma

Jadvalga muvofiq

2020-yil

1-fevralgacha

Akkreditatsiya markazi

14.

Laboratoriyalararo taqqoslash yo‘li bilan muvofiqlikni baholash bo‘yicha organlar malakasini tekshirishga doir faoliyatni yanada rivojlantirish.

Tadbirlar majmuasi

2019-yil
1-maygacha

“O‘zstandart”

agentligi

15.

Xalqaro standartlarga (ISO, IEC, EN, Codex Alimentarius) mos keladigan sinashning (o‘lchashning) zamonaviy usullarini amaliyotga joriy etish.

Idora hujjatlari

2019-2020
yillar

“O‘zstandart” agentligi,

Sog‘liqni saqlash vazirligi,

muvofiqlikni baholash organlari

16.

Muvofiqlikni baholash organlari sinov bazasini modernizatsiyalash va takomillashtirish.

Chora-tadbirlar kompleksi

17.

Muvofiqlikni baholash organlari xodimlarini xorijiy ekspertlarni jalb qilgan holda ISO/IEC 17000 xalqaro standartlari bo‘yicha o‘qitish.

Reja-jadval,

O‘qitish to‘g‘risida sertifikat

2019-2020
yillar

“O‘zstandart”

agentligi,

Akkreditatsiya markazi

V. Xalqaro ixtisoslashtirilgan tashkilotlarga a’zo bo‘lish

18.

APAC ning to‘la huquqli a’zosi maqomini olish uchun buyurtmanoma berish.

ARASga buyurtmanomani yo‘llash

2019-yil

1-dekabrgacha

Akkreditatsiya
markazi

19.

APAC ekspertlari tomonidan Akkreditatsiya markazini baholash (birinchi va ikkinchi baholash) hamda muvofiqlikni baholash organlarini birgalikda baholash, tuzatish tadbirlarini olib borish.

ARAS ekspertlarining baholash to‘g‘risida hisoboti

2020-yil

mart — iyul

Akkreditatsiya
markazi

20.

APAC ning to‘la huquqli a’zosi maqomini olish.

APAC qarori

ARAS Assambleyasi yakuni bo‘yicha

Akkreditatsiya
markazi

21.

Akkreditatsiya markazining APAC-MRA ko‘p tomonlama bitimiga qo‘shilishi bo‘yicha zarur tartib-taomillarni amalga oshirish.

APAC-MRA bitimi

2020-yil

noyabr

Akkreditatsiya
markazi

22.

ILAC va IAF ga to‘la huquqli a’zosi maqomini olish uchun buyurtmanoma berish.

ILAC va IAF ga buyurtmanomani yo‘llash

APAC-MRA imzolangandan keyin 2 hafta muddatda

Akkreditatsiya
markazi

23.

ILAC va IAF ekspertlari tomonidan Akkreditatsiya markazini baholash (birinchi va ikkinchi baholash) hamda muvofiqlikni baholash organlarini birgalikda baholash, tuzatish tadbirlarini olib borish.

ILAC va IAF ekspertlarini baholash to‘g‘risida hisobot

ILAC va IAF bilan kelishilgan xolda 3 oy mobaynida

Akkreditatsiya
markazi

24.

ILAC va IAF to‘la huquqli a’zosi maqomini olish

ILAC va IAF to‘la huquqli a’zosi maqomini olish to‘g‘risidagi qarori

ILAC va IAF Assambleyasi yakunlari bo‘yicha

Akkreditatsiya
markazi

25.

Akkreditatsiya markazining ILAC-MRA va IAF-MLA ko‘p tomonlama o‘zaro tan olish bitimiga qo‘shilishi bo‘yicha zarur tartib-taomillarni amalga oshirish.

ILAC-MRA va IAF-MLA bilan bitim imzolash

to‘la huquqli a’zosi maqomini olgandan keyin bir oy mobaynida

Akkreditatsiya
markazi

26.

ILAC, IAF va APACning tegishli texnik qo‘mitalari va boshqa bo‘linmalari bilan ish yuzasidan hamkorlikni ta’minlash.

ILAC, IAF va APAC ga safarlar uyushtirish

doimiy asosda

Akkreditatsiya
markazi

Izoh. Ushbu rejada nazarda tutilgan tadbirlarni amalga oshirishda ishlab chiqilayotgan hujjatning shakli o‘zgartirilishi yoki ishlab chiqilayotgan hujjat boshqa bandlarda nazarda tutilgan boshqa hujjatlar bilan birlashtirilishi mumkin. Ikki va undan ortiq hujjat birlashtirilganda, tegishli bandlarni ijro etish uchun belgilangan eng kech muddat ularni ishlab chiqish muddati hisoblanadi.
Vazirlar Mahkamasining 2019-yil 24-apreldagi 349-son qaroriga
3-ILOVA
O‘zbekiston Respublikasi Hukumatining o‘z kuchini yo‘qotgan deb hisoblanayotgan ayrim qarorlari
ro‘yxati
1. Vazirlar Mahkamasining “Muvofiqlikni baholash to‘g‘risida”gi O‘zbekiston Respublikasi Qonunini amalga oshirish chora-tadbirlari to‘g‘risida” 2015-yil 14-oktabrdagi 292-son qarorida (O‘zbekiston Respublikasi QT, 2015-y., 10-son, 92-modda), 1-bandining ikkinchi xatboshi, shuningdek qarorga 1-ilova.
2. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish, shuningdek ba’zilarini o‘z kuchini yo‘qotgan deb hisoblash to‘g‘risida” 2017-yil 2-iyundagi 348-son qaroriga (O‘zbekiston Respublikasi QT, 2017-y., 6-son, 92-modda) ilovaning 6-bandi.

(Qonun hujjatlari ma’lumotlari milliy bazasi, 25.04.2019-y., 09/19/349/3007-son; Qonunchilik ma’lumotlari milliy bazasi, 12.03.2022-y., 09/22/114/0209-son, 05.04.2022-y., 09/22/153/0266-son, 01.06.2023-y., 09/23/223/0305-son)